ശബരിമല അരവണയ്ക്ക് ഉപയോഗിക്കുന്ന ഏലക്ക ഭക്ഷ്യയോഗ്യമല്ല; കേന്ദ്ര ഏജൻസി

കൊച്ചി: ശബരിമല അരവണയ്ക്ക് ഉപയോഗിക്കുന്ന ഏലം ഭക്ഷ്യയോഗ്യമല്ലെന്ന് കേന്ദ്ര ഏജൻസി റിപ്പോർട്ട്. എഫ് എസ് എസ് എ ഐ എക്സിക്യൂട്ടീവ് ഡയറക്ടർ ഇതു സംബന്ധിച്ച റിപ്പോർട്ട് ഹൈക്കോടതിയിൽ സമർപ്പിച്ചു. അരവണ ഉണ്ടാക്കാൻ ഉപയോഗിക്കുന്ന ഏലയ്ക്കയിൽ ഗുരുതരമായ ആരോഗ്യ പ്രശ്നങ്ങൾ സൃഷ്ടിക്കുന്ന 14 കീടനാശിനികളുടെ സാന്നിധ്യം കണ്ടെത്തി.

കീടനാശിനികളുടെ സാന്നിധ്യം അനുവദനീയമായ പരിധിയേക്കാൾ കൂടുതലാണെന്നും റിപ്പോർട്ടിൽ പറയുന്നു. അതിനാൽ, ഏലയ്ക്ക ഗുണനിലവാരം കുറഞ്ഞതാണെന്ന് വ്യക്തമായി. കോടതിയുടെ നിർദ്ദേശപ്രകാരം കേന്ദ്ര അതോറിറ്റി ഗുണനിലവാരം പരിശോധിച്ചു. പമ്പയിൽ നടത്തിയ പരിശോധനകളുടെ ഗുണനിലവാരം മികച്ചതാണെന്ന് നേരത്തെ റിപ്പോർട്ടുകളുണ്ടായിരുന്നു.

നേരത്തെ ദേവസ്വം ബോർഡാണ് പരിശോധന നടത്തിയത്. നിലവിൽ കരാർ കമ്പനി നൽകുന്ന ഏലം പൂർണ്ണമായും നീക്കം ചെയ്യേണ്ടി വരുമോ, പുതിയ ഏലം ഉപയോഗിച്ച് അരവണ തയ്യാറാക്കേണ്ടതുണ്ടോ എന്ന് കോടതി നിലപാട് എടുക്കുമ്പോൾ വ്യക്തമാകും.