ലോകകപ്പ് ഖത്തറില്‍; കോഴിമുട്ടയ്ക്ക് വില കൂടിയത് കേരളത്തിൽ
കോഴിക്കോട്: ഖത്തില്‍ നടക്കുന്ന ലോകകപ്പും കേരളത്തിലെ കോഴിമുട്ട വിപണിയും തമ്മില്‍ എന്തെങ്കിലും ബന്ധമുണ്ടോ?
ഉത്തരം അതേയെന്നാണ്. കാരണം ഖത്തറില്‍ നടന്ന ലോകകപ്പ് കാരണം കേരളത്തിലെ മുട്ടയുടെ വിലയില്‍ വന്‍ വര്‍ധനവാണ് ഉണ്ടായത്. കോഴി മുട്ടയ്ക്ക് വടക്കന്‍ ജില്ലകളില്‍ 1 രൂപയിലേറെയും താറാവ് മുട്ടയ്ക്ക് 1 രൂപയുമാണ് ഒരു മാസത്തിനിടെ വര്‍ധിച്ചത്.
ലോകകപ്പ് പ്രമാണിച്ച്‌ ഗള്‍ഫില്‍ നിന്നും മുട്ടയ്ക്ക് വന്‍തോതില്‍ ഓര്‍ഡര്‍ ലഭിച്ചതോടെയാണ് വില ഉയര്‍ന്നത്. ഒക്ടോബര്‍ ആദ്യം മൊത്ത വിപണിയില്‍ 4 രൂപ 55 പൈസയായിരുന്നു ഒരു കോടി മുട്ടയുടെ വിലയെങ്കില്‍ ഇപ്പോഴത് 5 രൂപ 70 പൈസയായി.ചില്ലറ വില്‍പ്പന ശാലയില്‍ 6 രൂപ 50 പൈസ വരെ ഈടാക്കുന്നുണ്ട്. താറാവ് മുട്ട ഒന്നിന് 8 രൂപയില്‍ നിന്ന് 9 രൂപയായി ഉയര്‍ന്നു. ചില്ലറ വിപണിയില്‍ 10 രൂപയ്ക്ക് മുകളില്‍ താറാവ് മുട്ടയ്ക്ക് വിലയുണ്ട്. കുട്ടനാട്ടില്‍ പക്ഷിപ്പനി ബാധിച്ച താറാവുകളെ കൂട്ടത്തോടെ കൊന്നൊടുക്കിയതും താറാവ് മുട്ടയുടെ ലഭ്യത കുറവിന് കാരണമായിട്ടുണ്ട്.
ഗള്‍ഫില്‍ നിന്ന് തമിഴ്‌നാട്ടിലെ വ്യാപാരികള്‍ക്ക് 5 കോടി കോഴിമുട്ടയാണ് ഓര്‍ഡര്‍ ലഭിച്ചത്. സംസ്ഥാനത്തേക്ക് കോഴിമുട്ട എത്തുന്നത് തമിഴ്‌നാട്ടിലെ നാമയ്ക്കലില്‍ നിന്നാണ്. പ്രതിദിനം മൂന്നര കോടിയോളം മുട്ടയാണ് നാമയ്ക്കലില്‍ ഉല്‍പ്പാദിപ്പിക്കുന്നത്. ക്രിസ്മസ് കാലം കൂടി എത്തുന്നതോടെ മുട്ട വില ഇനിയും ഉയരാന്‍ സാധ്യത ഉണ്ടെന്നാണ് വ്യാപാരികള്‍ പറയുന്നത്.
