ഇടുക്കി അടിമാലിക്ക് സമീപം കഞ്ചാവുമായി ഒരാൾ അറസ്റ്റിൽ

പിടിയിലായത് വാറണ്ട് പ്രകാരം പ്രതിയെ അറസ്റ്റ് ചെയ്യാൻ വീട്ടിൽ എത്തിയപ്പോൾ അഞ്ഞൂറ് രൂപ നിരക്കിൽ കഞ്ചാവ് വിൽപ്പന നടത്തുന്നതിനിടെ. പതിനാലോളം കഞ്ചാവു കേസുകളിൽ പ്രതിയായ ഇരുമ്പുപാലം സ്വദേശി ആനിച്ചുവട്ടിൽ സെയ്ദു മുഹമ്മദിനെയാണ് അടിമാലി എക്സൈസ് റേഞ്ച് സംഘം പിടികൂടിയത്. ഇന്ന് രാവിലെ അടിമാലി കോടതിയിൽ നിന്നുള്ള വാറണ്ട് പ്രകാരം പ്രതിയെ അറസ്റ്റ് ചെയ്യുന്നതിനായി വീട്ടിലെത്തിയപ്പോളാണ് പിടിയിലായത്. അഞ്ഞൂറ് രൂപ നിരക്കിൽ വിൽപ്പന നടത്തുന്നതിനായി പത്തോളം ചെറു പൊതികളിലാക്കി ഹോർലിക്സിൻ്റെ പ്ലാസ്റ്റിക് കുപ്പിയിൽ ആട്ടിൻകൂടി നടുത്ത് ഒളിപ്പിച്ചു വക്കുന്നതിനിടയിൽ പ്രതിയെ പിടികൂടുകയായിരുന്നു.

60 ഗ്രാം കഞ്ചാവാണ് കണ്ടെത്തിയത്. തമിഴ്നാട്ടിൽ നിന്നെത്തിക്കുന്ന ഗഞ്ചാവ് ചെറു പൊതികളാക്കി വിൽപ്പന നടത്തുന്നയാളാണിയാൾ. എക്സൈസ് ഇൻസ്പെക്ടർ എ കുഞ്ഞുമോൻ്റെ നേതൃത്വത്തിൽ നടത്തിയ റെയ്ഡിൽ പ്രിവൻ്റീവ് ഓഫീസർ വി പി സുരേഷ് കുമാർ, സിവിൽ എക്സൈസ് ഓഫീസർമാരായ കെ എസ് മീരാൻ, രഞ്ജിത്ത് കവിദാസ് ,ഷാരാമോൾ, ശരത് എസ് പി എന്നിവരും പങ്കെടുത്തു. പ്രതിയെ അടിമാലി കോടതിയിൽ ഹാജരാക്കി റിമാൻ്റ് ചെയ്തു.