അഭിലാഷിന്റെ മനോധൈര്യം ആറ് പേരുടെ ജീവൻ കാത്തു

കട്ടപ്പന: കൗന്തി സ്വദേശിയായ ചണ്ടനാക്കുന്നേൽ അഭിലാഷിന്റെ ധീരതയിൽ രക്ഷപെട്ടത് ആറ് പെൺകുട്ടികളുടെ ജീവൻ.വനമേഖലയോട് ചേർന്ന് കിടക്കുന്ന ഇടുക്കി ജലാശയത്തിലേയ്ക്ക് പോകും വഴിയാണ് ഒൻപതംഗ സംഘം സമീപവാസിയായ അഭിലാഷിനെയും വഴികാട്ടിയായി കൂടെ കൂട്ടിയത്. മേസ്തിരിപ്പണിക്കാരനായ അഭിലാഷ്
നന്നായി നീന്താൻ അറിയാവുന്ന ആളാണ്. അഭിലാഷിന്റെ സാന്നിധ്യമാണ് സംഘത്തിന് തുണയായത്. അഭിലാഷ് ഇല്ലായിരുന്നുവെങ്കിൽ ഒരുപക്ഷെ മറ്റ് ആറ് പെൺകുട്ടികളും അപകടത്തിൽപ്പെടുമായിരുന്നു. ഇന്നലെ രാവിലെയാണ് കാക്കനാട് നവനിർമാൺ സ്കൂളിലെ ഒൻപതാം ക്ലാസ് വിദ്യാർത്ഥിനികളായ അഞ്ച് പെൺകുട്ടികളും ഇവരിൽ ഒരാളുടെ പിതാവും സഹോദരങ്ങളായ മറ്റ് മൂന്ന് പേരും ഇടുക്കിയിൽ എത്തിയത്.പെൺകുട്ടികളിൽ ഒരാളുടെ ജൻമദിനം ആഘോഷിക്കുകയായിരുന്നു ലക്ഷ്യം. കൗന്തിയിലെ ഹോം സ്‌റ്റേയിൽ മുറിയെടുത്ത ശേഷം ഇടുക്കി ജലാശയം കാണുവാനാണ് വനത്തിലൂടെ പന്ത്രണ്ടാം ബ്ലോക്ക് താമരപ്പാറ ഭാഗത്ത് ഇവർ എത്തിയത്. പ്രദേശവാസിയായ അഭിലാഷിന്റെ സഹായത്തോടെയാണ് ജലാശയത്തിൽ ഇവർ എത്തിച്ചേർന്നത്.

തുടർന്ന് പെൺകുട്ടികൾ എല്ലാവരും കുളിക്കുന്നതിനായി ജലാശയത്തിൽ ഇറങ്ങുകയായിരുന്നു.ഒരു മണിക്കൂറോളം നേരം വെള്ളത്തിൽ ചിലവഴിച്ച ശേഷം കരയിലേയ്ക്ക് തിരികെ കയറുന്നതിന് മുൻപ് ഫോട്ടോയെടുക്കാൻ ശ്രമിക്കവെ എല്ലാവരും നിലതെറ്റി വെള്ളത്തിലേയ്ക്ക് മറിഞ്ഞ് വീഴുകയായിരുന്നു. ഒപ്പമുണ്ടായിരുന്ന അഭിലാഷ് എല്ലാവരെയും രക്ഷിച്ച് കരയ്ക്ക് കയറ്റിയപ്പോഴാണ് ഇഷ ഫാത്തിമയെന്ന കുട്ടിയെ കാണാനില്ലെന്ന് മനസിലായത്.

ഉടൻ തന്നെ തിരച്ചിൽ നടത്തിയെങ്കിലും കണ്ടെത്താനായില്ല.തുടർന്ന് കട്ടപ്പനയിൽ നിന്ന് ഫയർഫോഴ്സ് ഉദ്യോഗസ്ഥരെത്തി നടത്തിയ തിരച്ചിലിലാണ് കയത്തിൽ നിന്ന് മൃതദ്ദേഹം പുറത്തെടുത്തത്.നിലയില്ലാക്കയത്തിൽ നിന്നുമാണ് അഭിലാഷ് മറ്റ് ആറ് കുട്ടികളെയും ജീവിതത്തിലേക്ക് തിരികെയെത്തിച്ചത്.ഒരാളെ രക്ഷിക്കാൻ കഴിയാതെ പോയ വിഷമത്തിലാണ് അഭിലാഷിപ്പോൾ.