കോട്ടയം അതിരമ്പുഴയിലെത്തിയത് കുറുവ സംഘമെന്ന് സംശയം. മോഷണത്തിനായി എത്തിയത് വടിവാളും, കോടാലിയുമായി. സി സി ടി വി ദൃശ്യം പുറത്ത്

കോട്ടയം അതിരമ്പുഴയിലെ വീടുകളിൽ മോഷണത്തിന് ശ്രമിച്ചത് കുറുവ സംഘമാണോയെന്ന് സംശയത്തിൽ പൊലീസ്. ആറു വീടുകളിലാണ് ഇന്നലെ പുലര്‍ച്ചെയോടെ മോഷണശ്രമം ഉണ്ടായത്. ആയുധധാരികളായ മൂന്നംഗ സംഘമാണ് മോഷണത്തിനായി എത്തിയത്. വടിവാളും കോടാലിയും കയ്യിലേന്തിയ സംഘം അടിവസ്ത്രം മാത്രമാണ് ധരിച്ചിരുന്നത്. മോഷണ ശ്രമത്തിന് ശേഷം ഏറ്റുമാനൂർ പരിസരത്തേക്കാണ് സംഘം പോയതെന്ന് സിസിടിവി ദൃശ്യങ്ങളിൽ നിന്ന് പൊലീസ് കണ്ടെത്തി.

ഇന്നലെ പുലർച്ചെ അതിരമ്പുഴ പഞ്ചായത്തിലെ അഞ്ചാം വാർഡ് മനയ്ക്കപ്പാടം നീർമലക്കുന്നേൽ മുജീബ്, കളപ്പുരത്തട്ടേൽ ജോർജ്, ആറാം വാർഡ് തൃക്കേൽ ക്ഷേത്രത്തിന്റെ സമീപം നലീഫ മൻസിൽ യാസിർ, പൈമറ്റത്തിൽ ഇക്ബാൽ, ശ്രീപുരത്ത് ഇല്ലത്ത് ജയകുമാർ, ഏഴാം വാർഡിലെ യാസ്മിൻ എന്നിവരുടെ വീടുകളിലാണ് മോഷണ ശ്രമം നടന്നത്.

യാസിറിന്റെ ഭാര്യയുടെ മെറ്റൽ ‍പാദസരം സ്വർണത്തിന്റേതെന്നു കരുതി അപഹരിച്ചു. യാസ്മിന്റെ വീടിന്റെ വാതിൽ മോഷ്ടാക്കൾ കുത്തിത്തുറക്കാൻ ശ്രമിക്കുന്നതിനിടെ ശബ്ദം കേട്ട് വീട്ടുകാർ ഉണർന്നു. ശബ്ദം വച്ചതോടെ സംഘം കടന്നു. വാർഡ് അംഗം ബേബിനാസ് അജാസിനെ ഫോണിലൂടെ വിവരമറിയിച്ചു. ഏറ്റുമാനൂർ പൊലീസ് പരിശോധന നടത്തിയെങ്കിലും മോഷ്ടാക്കളെ കണ്ടെത്താനായില്ല. കർശനമായ പരിശോധന തുടരുകയാണെന്ന് പൊലീസ് അറിയിച്ചു.