പാറമടക്കുളത്തിൽ യുവാക്കളെ മരിച്ച നിലയിൽ കണ്ടെത്തിയ സംഭവം, ഇരുവരും കാൽ വഴുതി വീണതാകാമെന്ന് നിഗമനം.

ഇടുക്കി വണ്ണപ്പുറത്ത് മെറ്റൽ ക്രഷറർ യൂണിറ്റിലെ പാറമട കുളത്തിൽ രണ്ടു യുവാക്കളെ മരിച്ച നിലയിൽ കണ്ടെത്തി.ഒടിയപാറ സ്വദേശികളായ രതീഷ് രാഘവൻ,അനീഷ് ജോൺ എന്നിവരെയാണ് മരിച്ച നിലയിൽ കണ്ടെത്തിയത്. രാവിലെ പുല്ല് പറിക്കാനെത്തിയവരാണ് വണ്ണപ്പുറം ഒടിയ പാറ കക്കാട്ട് മെറ്റൽ ക്രഷർ യൂണിറ്റിലെ കുളത്തിൽ മരിച്ച നിലയിൽ കണ്ടെത്തിയത്. നാട്ടുകാർ വിവരമറിയിച്ചതനുസരിച്ച് പോലീസും ഫയർഫോഴ്സും സ്ഥലത്തെത്തിയാണ് മൃതദേഹം കരയ്ക്ക് കയറ്റിയത്.കാൽ വഴുതിയാകാം ഇരുവരും കുളത്തിൽ വീണതെന്ന നിഗമനത്തിലാണ് പോലീസ്. കഴിഞ്ഞ ഞായറാഴ്ച മുതൽ ഇരുവരെയും കാണാതായിരുന്നു.ഇവരുടെ മൊബൈൽ ഫോൺ ,ചെരിപ്പ് തുടങ്ങിയവ സമീപത്ത് നിന്നും കണ്ടെടുത്തിട്ടുണ്ട് . മൃതദേഹങ്ങൾ തൊടുപുഴയിലെ ജില്ലാ ആശുപത്രിയിലേക്ക് മാറ്റി . സംഭവത്തിൽ കാളിയാർ പോലീസ് അന്വേഷണം ആരംഭിച്ചു.