രണ്ടു മാസം തികയും മുന്പേ സുന്നത്ത് കര്മം; കുഞ്ഞിന് ദാരുണാന്ത്യം
കോഴിക്കോട് സുന്നത്ത് കര്മ്മത്തിനായി സ്വകാര്യ ക്ലിനിക്കില് പ്രവേശിപ്പിച്ച രണ്ട് മാസം പ്രായമായ കുഞ്ഞ് മരിച്ചു.
ഞായറാഴ്ച രാവിലെയാണ് സുന്നത്ത് കര്മ്മത്തിനായി കുട്ടിയെ കടുംബം കാക്കൂരിലെ സ്വകാര്യ ക്ലിനിക്കില് എത്തിച്ചത്. അസ്വാഭാവിക മരണത്തിന് കാക്കൂര് പൊലിസ് കേസെടുത്തു.
ചേളന്നൂര് സ്വദേശി ഇംത്യാസിന്റെ രണ്ടുമാസം പ്രായമുള്ള മകന് എമിന് ആദമാണ് മരിച്ചത്. കോപ്പറേറ്റീവ് ക്ലിനിക്കില് വെച്ചാണ് അനസ്തീസിയ നല്കിയത്. ശസ്ത്രക്രിയയ്ക്ക് മുമ്പായി പ്രാഥമിക ചികിത്സയോട് കുട്ടി പ്രതികരിക്കാത്തതിനെ തുടര്ന്ന് കോഴിക്കോട്ടെ ആശുപത്രിയില് എത്തിക്കാന് ഡോക്ടര് നിര്ദ്ദേശിക്കുകയായിരുന്നു.
തുടര്ന്ന് കോഴിക്കോട്ടെ സ്വകാര്യ ആശുപത്രിയില് കുട്ടിയെ എത്തിച്ചെങ്കിലും ജീവന് രക്ഷിക്കാനായില്ല. പോസ്റ്റ്മോര്ട്ടത്തിനായി കുട്ടിയുടെ മൃതദേഹം കോഴിക്കോട് മെഡിക്കല് കോളേജിലേക്ക് മാറ്റി.
