തിങ്കളാഴ്ച (ഒക്ടോബര്‍ 21) മന്ത്രിമാരുടെ മൂന്ന് പരിപാടികള്‍ ജില്ലയില്‍
നിലവിലെ വിവരങ്ങള്‍ അനുസരിച്ച് തിങ്കളാഴ്ച വിവിധ മന്ത്രിമാരുടെ മൂന്ന് പരിപാടികളാണ് ജില്ലയില്‍ നടക്കുക.
*കട്ടപ്പന ഐ ടി ഐക്ക് പുതിയ കെട്ടിടം : ഉദ്ഘാടനം ഒക്ടോബര്‍ 21 ന്*
കട്ടപ്പന സര്‍ക്കാര്‍ ഐ ടി ഐ യില്‍ നിര്‍മ്മാണം പൂര്‍ത്തീകരിച്ച പുതിയ കെട്ടിടത്തിന്റെ ഉദ്ഘാടനം ഒക്ടോബര്‍ 21 രാവിലെ 10 ന് തൊഴിലും നൈപുണ്യവും വകുപ്പ് മന്ത്രി വി. ശിവന്‍കുട്ടി നിര്‍വഹിക്കും. ജലവിഭവ വകുപ്പ് മന്ത്രി റോഷി അഗസ്റ്റിന്‍ അധ്യക്ഷത വഹിക്കും.
*മഴവെള്ള സംഭരണികള്‍, ഉദ്ഘാടനം 21ന്*
സര്‍ക്കാരിന്റെ നാലാം നൂറ് ദിന പരിപാടിയുടെ ഭാഗമായി ജലവിഭവവകുപ്പിന്റെ നേതൃത്വത്തില്‍ വാഴത്തോപ്പ് ഗ്രാമ പഞ്ചായത്തില്‍ പൂര്‍ത്തീകരിച്ച മഴവെള്ള സംഭരണികളുടെ ഉദ്ഘാടനം ജലവിഭവവകുപ്പ് മന്ത്രി റോഷി അഗസ്റ്റിന്‍ 21ന് ഉച്ചയ്ക്ക് 12 ന് തടിയമ്പാട് ഉദ്ഘാടനം ചെയ്യും. ജലനിധി വഴി 39.50 ലക്ഷം രൂപ ചെലവഴിച്ചാണ് മഴവെള്ള സംഭരണികള്‍ നിര്‍മ്മിച്ചത്. പരിപാടിയില്‍ ഗ്രാമപഞ്ചായത്ത് പ്രസിഡന്റ് ജോര്‍ജ് പോള്‍ അധ്യക്ഷത വഹിക്കും. ഇടുക്കി ബ്ലോക്ക് പഞ്ചായത്ത് പ്രസിഡന്റ് ആന്‍സി തോമസ്, ജലനിധി റീജിയണല്‍ പ്രോജക്ട് ഡയറക്ടര്‍ കെ കെ ബിജുമോന്‍, മറ്റ് ജനപ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുക്കും.
*മൂന്നാര്‍ ലേബര്‍ കോംപ്ലക്‌സ് ഉദ്ഘാടനം 21ന്*
തൊഴില്‍ വകുപ്പ് മൂന്നാറില്‍ നിര്‍മ്മിച്ച ലേബര്‍ കോംപ്ലക്‌സ് ഒക്ടോബര്‍ 21വൈകീട്ട് നാലിന് തൊഴില്‍വകുപ്പ് മന്ത്രി വി ശിവന്‍കുട്ടി ഉദ്ഘാടനം ചെയ്യും . ദേവികുളം എംഎല്‍എ അഡ്വ. എ രാജ പരിപാടിയില്‍ അധ്യക്ഷത വഹിക്കും. ഇടുക്കി എംപി ഡീന്‍ കുര്യാക്കോസ് മുഖ്യാതിഥിയാകും. ജില്ലാ പഞ്ചായത്ത് പ്രസിഡന്റ് കെടി ബിനു, അഡീഷണല്‍ ലേബര്‍ കമ്മീഷണര്‍ കെ എം സുനില്‍,ത്രിതലപഞ്ചായത്ത് ജനപ്രതിനിധികള്‍ ,ഉദ്യോഗസ്ഥര്‍ തുടങ്ങിയവര്‍ പങ്കെടുക്കും. ഡെപ്യൂട്ടി ലേബര്‍ ഓഫീസ്, ഇന്‍സ്‌പെക്ടര്‍ ഓഫ് പ്ലാന്റേഷന്‍ ഓഫീസ്, അസിസ്റ്റന്റ് ലേബര്‍ ഓഫീസ് എന്നിവയാണ് ലേബര്‍ കോംപ്ലക്‌സില്‍ പ്രവര്‍ത്തിക്കുക.
