പെരിയാറിലെ ജലനിരപ്പ് ഉയര്‍ന്നതോടെ ആലുവ ശിവക്ഷേത്രത്തില്‍ വെള്ളം കയറി
ആലുവ: പെരിയാറിലെ ജലനിരപ്പ് ഉയര്‍ന്നതോടെ ആലുവ ശിവക്ഷേത്രത്തില്‍ വെള്ളം കയറി. കഴിഞ്ഞ 12 മണിക്കൂറിനുള്ളില്‍ പെരിയാറിലെ ജലനിരപ്പ് 1.5 മീറ്റര്‍ ഉയര്‍ന്നു.
ആലുവ ക്ഷേത്രം വെള്ളത്തില്‍ മുങ്ങിയതിനെ തുടര്‍ന്ന് അതിരാവിലെയുള്ള ചടങ്ങുകള്‍ തടസ്സപ്പെട്ടു.
ഒഴുക്ക് കാരണം, വെള്ളത്തിലെ ചെളിയുടെ അളവും 70 എന്‍ടിയു ആയി ഉയര്‍ന്നു. ആലുവ ജലശുദ്ധീകരണ പ്ലാന്‍റിലെ ജലനിരപ്പ് സമുദ്രനിരപ്പില്‍ നിന്ന് 2.3 മീറ്റര്‍ ഉയരത്തിലാണ് രേഖപ്പെടുത്തിയത്. ഇന്നലെ 80 സെന്‍റിമീറ്റര്‍ മാത്രമായിരുന്നു ജലനിരപ്പ്.
കാലാവസ്ഥാ പ്രവചനവും നീരൊഴുക്കും കണക്കിലെടുത്ത് ചട്ടം അനുസരിച്ച്‌ ജലനിരപ്പ് ക്രമീകരിക്കുന്നതിന്‍റെ ഭാഗമായി ഇടമലയാര്‍ ഡാമിന്‍റെ രണ്ട് ഷട്ടറുകള്‍ ഇന്നലെ 25 സെന്‍റീമീറ്റര്‍ കൂടി ഉയര്‍ത്തിയിരുന്നു. ഇതിലൂടെ 131.69 ക്യുമെക്സ് വെള്ളം തുറന്നുവിട്ടു. ഇതും മഴയുമാണ് പെരിയാറിലെ ജലനിരപ്പ് ഉയരാന്‍ കാരണം. പെരിയാറിന്‍റെ തീരത്തുള്ളവര്‍ക്ക് ജാഗ്രതാ നിര്‍ദേശം നല്‍കിയിട്ടുണ്ട്.
