മദ്യലഹരിയിൽ ‘റോക്കി’യായി ഭാര്യയെ മർദിച്ചു; ഒടുവിൽ അറസ്റ്റ്
കട്ടപ്പന : മദ്യലഹരിയില്‍ ഭാര്യയെ ക്രൂരമായി മര്‍ദ്ദിച്ച ജെ സി ബി ഉടമയെ വണ്ടൻമേട് പൊലീസ് അറസ്റ്റ് ചെയ്തു.അണക്കര പുല്ലുവേലില്‍ ജിഷ്ണുദാസ് (ഉണ്ണി-27) ആണ് അറസ്റ്റിലായത്. ചൊവ്വാഴ്ചയാണ് മദ്യപിച്ചെത്തിയ ജിഷ്ണുദാസ് ഭാര്യയെ ആക്രമിച്ചത്.
ഭാര്യ പൊലീസിൽ നൽകിയ മൊഴിയിങ്ങനെ : മദ്യപിച്ചെത്തിയ ഭർത്താവ് ജിഷ്ണുദാസ് താൻ കെ ജി എഫ് ലെ കഥാപാത്രമായ റോക്കി ഭായ് ആണെന്ന് പറയുകയും കയ്യിൽ ധരിച്ചിരുന്ന വലിയ മോതിരം ഉപയോഗിച്ച് മുഖത്ത് ഉൾപ്പടെ മർദ്ദിച്ചു.തുടർന്ന് കഴുത്തിൽ കുത്തിപ്പിടിച്ച് ശ്വാസം മുട്ടിക്കുവാൻ നോക്കി.
ഭാര്യാ പിതാവ് എത്തിയപ്പോൾ അദ്ദേഹത്തിന്റെ മുൻപിൽ വച്ചും ജിഷ്ണു മർദ്ദിച്ചു.ഭാര്യയുടെ പരാതിയിൽ കഴിഞ്ഞ ദിവസം ജിഷ്ണുദാസിനെ പൊലീസ് കസ്റ്റഡിയിൽ എടുക്കുകയായിരുന്നു. വധശ്രമം ഉള്‍പെടെയുള്ള വകുപ്പുകള്‍ ചുമത്തിയാണ് കേസെടുത്തിരിക്കുന്നത്.പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
