പാമ്പാടിയില്‍ നിന്നും കാണാതായ പിതാവിന്റെയും പെൺകുട്ടിയുടെയും മൃതദേഹം കല്ലാറുകുട്ടി ഡാമിൽ നിന്നും കണ്ടെത്തി.
ഇന്നലെ കോട്ടയം പാമ്പാടി ചെമ്പൻകുഴിയിലെ വീട്ടിൽ നിന്നും കാണാതായ കരുവിക്കാട്ടിൽ ബിനീഷിനെയും മകൾ പാർവ്വതിയെയും കണ്ടെത്തുന്നതിനാണ് കല്ലാറുകുട്ടിയിലും പരിസരപ്രദേശങ്ങളിലും പോലീസ് തിരച്ചിൽ ആരംഭിച്ചത്. ഇന്നലെ രാത്രി 8 മണിയോടെ കല്ലാറുകുട്ടി പാലത്തിനടുത്തുനിന്നാണ് ഇവരുടെ ബൈക്ക് കണ്ടെത്തിയത്. പോലീസിന്റെയും ഫയർഫോഴ്സിന്റെയും നേതൃത്വത്തിൽ ഇന്ന് രാവിലെ മുതൽ തിരച്ചിൽ നടത്തുകയായിരുന്നു.
ഇന്നലെ രാവിലെ 11.30 തോടെ ഇവരെ കാണാതാവുകയായിരുന്നു.വൈകുന്നേരം വരെ വീട്ടുകാർ പല സ്ഥലങ്ങളിൽ അന്വേഷിച്ചെങ്കിലും കണ്ടെത്തെനായില്ല. തുടർന്നാണ് ബന്ധുവായ ബിജു പാമ്പാടി സ്റ്റേഷനിലെത്തി വിവരം ധരിപ്പിച്ചത് . പോലീസ് ബിനീഷിന്റെ ഫോൺ ലൊക്കേഷൻ പരിശോധിച്ചപ്പോൾ അടിമാലിക്ക് അടുത്ത് ഇവർ എത്തിയതായി ബോദ്ധ്യപ്പെട്ടു. പാമ്പാടി പോലീസ് ഈ വിവരം അടിമാലി പോലീസിന് കൈമാറി.രാത്രി അടിമാലി പോലീസ് നടത്തിയ തിരച്ചിലിലാണ് ബൈക്ക് കണ്ടെത്തിയത്. ഉച്ചയോടെ പിതാവിന്റെ മൃതദേഹം കണ്ടെത്തുകയായിരുന്നു. തുടർന്ന് നടത്തിയ തിരച്ചിലിൽ പെൺകുട്ടിയുടെയും മൃതദേഹം കണ്ടെത്തുകയായിരുന്നു.
ബിനീഷ് മരപ്പണിക്കാരനും പാർവ്വതി പ്ലസ് വൺ വിദ്യാർത്ഥിനിയുമാണ്.ഇരുവരുടെയും മൃതദേഹം അടിമാലി താലൂക്ക് ആശുപത്രിയിലേക്ക് മാറ്റിയിട്ടുണ്ട്.
