പ്ലസ്ടു ഫലം പ്രസിദ്ധീകരിച്ച് ഒരാഴ്‌ചയ്ക്കകം ബിരുദ രജിസ്‌ട്രേഷൻ
കാലിക്കറ്റ് സർവകലാശാലയുടെ അഫിലിയേറ്റഡ് കോളേജുകളിലേക്കുള്ള ഏകജാലക ബിരുദ പ്രവേശന രജിസ്‌ട്രേഷൻ പ്ലസ്ടു ഫലം പ്രസിദ്ധീകരിച്ച് ഒരാഴ്‌ചയ്ക്കുള്ളിലും പി.ജി. രജിസ്‌ട്രേഷൻ ബിരുദഫലം പ്രസിദ്ധീകരിച്ച് ഒരാഴ്‌ചയ്ക്കുള്ളിലും ആരംഭിക്കും. സർവകലാശാലാ കേന്ദ്രങ്ങളിലേക്കും മുന്നൂറോളം അഫിലിയേറ്റഡ് കോളേജുകളിലേക്കുമാണ് ബിരുദപ്രവേശനം. ഏകജാലക രജിസ്‌ട്രേഷൻ നടപടിക്രമങ്ങൾ cuonline.ac.in ലഭ്യമാകും.
വിദ്യാർഥികൾ നിർദേശങ്ങൾ വായിച്ചു മനസ്സിലാക്കിയശേഷമേ രജിസ്‌ട്രേഷൻ നടത്താവൂ. കോഴ്‌സുകൾ, കോളേജുകൾ എന്നിവയെ സംബന്ധിച്ച വിവരങ്ങൾ വെബ്‌സൈറ്റിൽ ലഭ്യമാണ്. സ്വാശ്രയ കോഴ്‌സുകൾ, സ്വാശ്രയ കോളേജുകൾ എന്നിവ പ്രത്യേകമായി രേഖപ്പെടുത്തിയിട്ടുണ്ട്. കോഴ്‌സുകളെക്കുറിച്ച് തിരഞ്ഞാൽ ഏതെല്ലാം കോളേജുകളിൽ ലഭ്യമാണെന്നും കോളേജുകൾ തിരഞ്ഞാൽ ഏതെല്ലാം കോഴ്‌സുകൾ ലഭ്യമാണെന്നും വിവരം ലഭിക്കും. രജിസ്‌ട്രേഷൻ നടത്തുന്നതിനു മുൻപായി കോഴ്‌സ്, കോളേജ് എന്നിവയെക്കുറിച്ചും സംവരണ മാനദണ്ഡങ്ങളെക്കുറിച്ചും വിദ്യാർഥികൾ വ്യക്തമായി അറിഞ്ഞിരിക്കണമെന്ന് സർവകലാശാലാ പ്രവേശനവിഭാഗം അറിയിച്ചു. ഫോൺ: 0494 2660600, 2407016, 2407017.
