കട്ടപ്പനയിൽ എൽഡിഎഫ് സ്ഥാനാർഥി അഡ്വ.ജോയ്സ് ജോർജിന്റെ തിരഞ്ഞെടുപ്പ് പ്രചരണത്തിന് സമാപനം കുറിച്ചുനടന്ന പ്രകടനത്തിനിടെ പൊലീസും പ്രവർത്തകരും തമ്മിൽ വാക്കേറ്റം

കട്ടപ്പന ഇടുക്കിക്കവലയിൽ നിന്നാരംഭിച്ച പ്രകടനം സെൻട്രൽ ജംക്ഷനിൽ എത്തിയപ്പോൾ പൊലീസ് പ്രവർത്തകരെ തടഞ്ഞു. എന്നാൽ വാഹനവുമായി മുന്നോട്ടുപോയി പൊലീസ് സ്റ്റേഷൻ പരിസരത്തുകൂടി ചുറ്റിയെത്തി സെൻട്രൽ ജംക്ഷനിൽ കൊട്ടിക്കലാശം നടത്താമെന്ന നിലപാടിലായിരുന്നു പ്രവർത്തകർ. ഇത് പൊലീസും പ്രവർത്തകരും തമ്മിൽ ചെറിയ തോതിൽ വാക്കേറ്റത്തിനു കാരണമായി. അൽപ്പസമയത്തിനുശേഷം പൊലീസ് പിൻവാങ്ങിയതോടെ പ്രകടനം മുന്നോട്ടുപോയി. പ്രകടനമായെത്തിയ എൻഡിഎ പ്രവർത്തകർ ഗാന്ധി സ്‌ക്വയറിൽ നിലയുറപ്പിച്ചിരുന്നതിനാൽ സംഘർഷാവസ്ഥ ഉണ്ടാകാതിരിക്കാൻ പൊലീസ് സംഘം ഇവർക്കിടയിൽ നിലയുറപ്പിച്ചു. പ്രകടനം പൊലീസ് സ്റ്റേഷൻ പരിസരത്തുകൂടി ചുറ്റി ഗാന്ധി സ്‌ക്വയറിലൂടെയെത്തി സെൻട്രൽ ജംക്ഷനിൽ സമാപിച്ചു.