കാഞ്ചിയാർ സ്വരാജിൽ കഞ്ചാവുമായി സ്കൂൾ ബസ് ഡ്രൈവർ അറസ്റ്റിൽ

കട്ടപ്പന : കാഞ്ചിയാർ സ്വരാജിൽ കഞ്ചാവുമായി സ്കൂൾ ബസ് ഡ്രൈവർ അറസ്റ്റിൽ. നാട്ടുകാർക്കിടയിൽ വിൽപ്പന നടത്തുന്നുണ്ടെന്ന രഹസ്യ വിവരത്തിൻ്റെ അടിസ്ഥാനത്തിൽ ഇടുക്കി എസ്.പിയുടെ കീഴിലുള്ള ആന്റി നർകോട്ടിക് സ്പെഷ്യൽ ആക്ഷൻ ഫോഴ്സിന്റെ പരിശോധനയിലാണ് സ്കൂൾ ബസ് ഡ്രൈവറായ സ്വരാജ് കോവിൽമല  വിളയാനിക്കൽ സുധീഷ് ( 34) കഞ്ചാവുമായി അറസ്റ്റിലായത്.1 കിലോയിലധികം കഞ്ചാവാണ് ഇയാളുടെ വീട്ടിൽ ഒളിപ്പിച്ചു വച്ച നിലയിൽ കണ്ടെത്തിയത്. നാട്ടുകാർക്കിടയിൽ ചെറിയ പായ്ക്കറ്റുകളായി വിൽക്കുന്നതിനാണ് പ്രതി കഞ്ചാവ്  വീട്ടിൽ സൂക്ഷിച്ചതെന്ന് പൊലീസ് പറഞ്ഞു.2 കിലോ കഞ്ചാവാണ് ഇയാൾ വിൽപ്പനയ്ക്കായി  മറ്റൊരു സ്ഥലത്ത് നിന്ന് വാങ്ങിയത്.
ഇതിൽ എണ്ണൂറ് ഗ്രാം വിൽക്കുകയും ചെയ്തിരുന്നു.മാസങ്ങളായി പ്രതി കഞ്ചാവ് വിൽപ്പന നടത്തി വന്നിരുന്നതായും പൊലീസ് വ്യക്തമാക്കി.കട്ടപ്പന ഡിവൈ.എസ്പി പി.വി ബേബി, എസ് എച്ച് ഒ
എൻ .സുരേഷ്കുമാർ എന്നിവരുടെ മേൽനോട്ടത്തിലാണ് ഡാൻസാഫ് ടീം പ്രതിയെ പിടികൂടിയത്.
രഹസ്യ വിവരത്തെ തുടർന്ന് കഴിഞ്ഞ കുറച്ച് ദിവസങ്ങളായി ഇയാൾ അന്വേഷണ സംഘത്തിൻ്റെ നിരീക്ഷണത്തിലായിരുന്നു.സ്വരാജിലുള്ള സ്വകാര്യ സ്കൂളിലെ ബസാണ്  പ്രതി ഓടിച്ചിരുന്നത്.