മൂന്നാർ നല്ലതണ്ണിയിൽ കടന്നലുകളുടെ ആക്രമണം; സ്ത്രീ തൊഴിലാളികൾ ഉൾപ്പെടെയുള്ളവർക്ക് കടന്നൽ കുത്തേറ്റു

മൂന്നാർ നല്ലതണ്ണി കുറുമലയിലെ ഫീൽഡ് നമ്പർ 12 എ -യിൽ സ്ത്രീ തൊഴിലാളികൾ കൊളുന്തെടുക്കുന്നതിനിടെ, ചെടിയിൽ കൂടുകൂട്ടിയിരുന്ന കടന്നൽക്കൂട്ടം കുത്തുകയായിരുന്നു. സ്ത്രീതൊഴിലാളികൾ സാരി ഉപയോഗിച്ചും പുരുഷൻമാർ കൈയ്യിൽ കരുതിയിരുന്ന തോർത്ത് ഉപയോഗിച്ചും മുഖം പൊത്തി ഓടി രക്ഷപ്പെട്ടു. 25 പേർക്കാണ് കുത്തേറ്റത്. ഇതിൽ 14 പേരെ മൂന്നാർ ഹൈറേഞ്ച് ആശുപത്രിയിൽ പ്രവേശിപ്പിച്ചു. തോട്ടം മേഖലയിൽ കടന്നൽ കൂട്ടവും തേനീച്ചകളും തൊഴിലാളികൾക്ക് വലിയ ഭീഷണിയാണ്. വേനൽ ശക്തമായതോടെ ഇവകൂടുവിട്ടിറങ്ങി ആക്രമിക്കാനുള്ള സാധ്യത കൂടുതലാണ്.