വാഹനങ്ങളില്‍ സൂക്ഷിച്ചിരുന്ന 223 ഗ്രാം കഞ്ചാവ് പിടികൂടി
നെടുങ്കണ്ടം: ഉടുമ്പന്‍ചോല എക്സൈസ് ഓഫിസിന്റെ നേതൃത്വത്തില്‍ നടത്തിയ പരിശോധനയില്‍ വാഹനങ്ങളില്‍ സൂക്ഷിച്ചിരുന്ന 223 ഗ്രാം കഞ്ചാവ് പിടികൂടി.
പുളിയന്മല ഹേമക്കടവ് ഭാഗത്ത് നടത്തിയ റെയ്ഡിലാണ് കഞ്ചാവ് പിടികൂടിയത്. വണ്ടന്മേട് ശിവന്‍കോളനി സരസ്വതി വിലാസം രാംകുമാറിനെ(23) 23 ഗ്രാം കഞ്ചാവുമായി അറസ്റ്റ് ചെയ്തു. കൂടെയുണ്ടായിരുന്നു രണ്ട് പ്രതികള്‍ ഓടി രക്ഷപെട്ടു. അറസ്റ്റ് ചെയ്യപ്പെട്ട രാംകുമാര്‍ പറഞ്ഞത് പ്രകാരം വഴിയരികില്‍ കിടന്നിരുന്ന പുളിയന്മല സ്വദേശി അജിത് (24) ഉപയോഗിച്ചിരുന്ന ഓട്ടോറിക്ഷയില്‍ സൂക്ഷിച്ചിരുന്ന 74 ഗ്രാം കഞ്ചാവും പിടികൂടി.
ഹേമകടവ് പുതുപ്പറമ്പില്‍ ലിജോ ജെയിംസ് (30) ഉപയോഗിച്ച് വന്നിരുന്ന കാറില്‍ സൂക്ഷിച്ചിരുന്ന 123 ഗ്രാം കഞ്ചാവും കണ്ടെത്തി. മൂന്ന്‌പേര്‍ക്കെതിരെയും കേസെടുത്തു. രണ്ട് വാഹനങ്ങളും കസ്റ്റഡിയില്‍ എടുത്തു. ഉടുമ്പന്‍ചോല റെയിഞ്ച് എക്സൈസ് ഇന്‍സ്പക്ടര്‍ സെബാസ്റ്റിയന്‍ ജോസഫ്, എക്സൈസ് പ്രിവന്റീവ് ഓഫിസറായ ഡി. സതീഷ്‌കുമാര്‍, ഗ്രേഡ് പ്രിവന്റീവ് ഓഫിസര്‍മാരായ തോമസ് ജോണ്‍, എന്‍.വി. ശശിന്ദ്രന്‍, സിവില്‍ എക്സൈസ് ഓഫിസര്‍മാരായ ടില്‍സ് ജോസഫ്, അരുണ്‍ മുരളീധരന്‍, റോണി ആന്റണി, വനിത സിവില്‍ എക്സൈസ് ഓഫിസര്‍ ജി. രേഖ, വി.പി. ബിലേഷ് എന്നിവരടങ്ങിയ സംഘമാണ് കഞ്ചാവ് പിടികൂടിയത്.
