അടിമാലിയിൽ എം ഡി എം എ യുമായി യുവാവ് പിടിയിൽ

അടിമാലി നാർക്കോട്ടിക് എൻഫോഴ്സ്മെൻ്റ് സ്ക്വാഡിലെ സർക്കിൾ ഇൻസ്പെക്‌ടർ കെ രാജേന്ദ്രനും സംഘവും നടത്തിയ വാഹന പരിശോധനക്കിടെയാണ് എം ഡി എം എയുമായി യുവാവിനെ കസ്റ്റഡിയിൽ എടുത്തത്. അടിമാലി കല്ലാർ സ്വദേശി വിശ്വനാഥനാണ് പിടിയിലായത്.ഇയാളുടെ പക്കൽ നിന്നും അഞ്ച് ഗ്രാം എം ഡി എം എ പിടിച്ചെടുത്തു. അടിമാലി ചാറ്റുപാറ ഭാഗത്തായിരുന്നു നാർക്കോട്ടിക് സംഘം വാഹന പരിശോധന നടത്തി വന്നിരുന്നത്. എറണാകുളം ഭാഗത്ത് നിന്നും വാങ്ങുന്ന രാസലഹരി അടിമാലിയിൽ എത്തിച്ച് ചില്ലറ വിൽപ്പന നടത്തുകയായിരുന്നു പ്രതിയുടെ ലക്ഷ്യമെന്ന് നാർക്കോട്ടിക് ഉദ്യോഗസ്ഥർ പറഞ്ഞു. ഇയാൾ സഞ്ചരിച്ചിരുന്ന വാഹനവും കസ്റ്റഡിയിൽ എടുത്തു. പ്രിവന്റീവ് ഓഫിസർ പ്രദീപ് കെ വി, സിവിൽ എക്സൈസ് ഓഫീസർമാരായ സുരേഷ് കെ എം, ധനിഷ് പുഷ്പ ചന്ദ്രൻ, യധുവംശരാജ്, ഡ്രൈവർ നിതിൻ ജോണി എന്നിവരും പരിശോധനയിൽ പങ്കെടുത്തു.