നെടുങ്കണ്ടം സി.എസ്.ഐ പള്ളിക്ക് സമീപം കാര്‍ 50 അടി താഴ്ചയിലേക്ക് മറിഞ്ഞ് നാല് പേര്‍ക്ക് പരിക്ക്
നെടുങ്കണ്ടം: നെടുങ്കണ്ടം സി.എസ്.ഐ പള്ളിക്ക് സമീപം കാര്‍ 50 അടി താഴ്ചയിലേക്ക് മറിഞ്ഞ് ഒരു കുടുംബത്തിലെ നാല് പേര്‍ക്ക് ഗുരുതരമായി പരുക്ക്. നെടുങ്കണ്ടം കളത്തില്‍ ഷോജി(42), ഭാര്യ ജൂലി(40), മക്കളായ എഡ്വിന്‍(16), എല്‍വിന്‍(13) എന്നിവര്‍ക്കാണ് പരുക്കേറ്റത്. ഇന്നലെ രാവിലെ പത്തുമണിയോടെയാണ് അപകടം നടന്നത്. ഷോജിയും കുടുംബവും ബന്ധുവീട്ടിലേക്ക് പോകുന്നതിനായി നെടുങ്കണ്ടത്തേക്ക് വരികയായിരുന്നു. സി.എസ്.ഐ പള്ളിക്ക് സമീപത്തെ കുത്തിറക്കത്തിന് തൊട്ടുമുമ്പുള്ള കൊടുംവളവില്‍ നിയന്ത്രണം നഷ്ടപ്പെട്ട കാര്‍ 50 അടി താഴ്ചയിലേക്ക് മറിയുകയായിരുന്നു. തലകീഴായി രണ്ട് തവണ മറിഞ്ഞ കാര്‍ തൊട്ടുതാഴെയുള്ള വീടിന് പിന്‍വശത്തെ മണ്‍തിട്ടയില്‍ ഇടിച്ചുനിന്നതിനാല്‍ വന്‍ ദുരന്തം ഒഴിവായി. ഈ വീടിന് സമീപം വലിയ പാറക്കുഴി ഉണ്ട്. ഇതിന് സമീപമായാണ് കാര്‍ ഇടിച്ചുനിന്നത്. ശബ്ദം കേട്ട് ഓടിയെത്തിയ പ്രദേശവാസികള്‍ കാറിലുണ്ടായിരുന്നവരെ പുറത്തെടുത്ത് നെടുങ്കണ്ടത്തെ സ്വകാര്യ ആശുപത്രിയില്‍ പ്രവേശിപ്പിച്ചു. പരിക്ക് ഗുരുതരമായിരുന്നതിനാല്‍ പിന്നീട് ഇവരെ കോട്ടയത്തെ സ്വകാര്യ ആശുപത്രിയിലേക്ക് മാറ്റി.
