ലോക്ഡൗണിൽ കറക്കം; 14 പേരെ പോലീസ് പിടികൂടി

മുട്ടം : കോവിഡ് നിയന്ത്രണങ്ങൾ ലംഘിച്ച് റോഡിൽ ഇറങ്ങിയ 14 പേരെയും അവരുടെ വാഹനങ്ങളും മുട്ടം പോലീസ് പിടികൂടി.

ശനിയാഴ്ച മുതൽ ബുധനാഴ്ച വരെ കോവിഡ് നിയന്ത്രണം ശക്തമാക്കിയതിനെ തുടർന്ന് മുട്ടം സി.ഐ. വി.ശിവകുമാറിന്റെ നേതൃത്വത്തിലുള്ള പോലീസ് റോഡിൽ നടത്തിയ പരിശോധനയിലാണ് ഇവർ പിടിയിലായത്. സർക്കാർ അനുവദിച്ചിരിക്കുന്ന സത്യവാങ്മൂലം ഇല്ലാതെയും നിരവധി ആളുകളാണ് ഓരോ കാരണങ്ങൾ നിരത്തി വാഹനങ്ങളിൽ കറങ്ങിനടന്നത്.

അത്യാവശ്യ സർവീസായി സർക്കാർ പ്രഖ്യാപിച്ചിട്ടുള്ള വിഭാഗങ്ങളിലെ ആളുകൾക്കും ജീവനക്കാർക്കും കൃത്യമായ രേഖകളോടെ യാത്ര ചെയ്യാൻ സർക്കാർ അനുമതി നൽകിയിട്ടുണ്ടെങ്കിലും അതൊന്നും ഇല്ലാതെയാണ് മിക്കവരും യാത്ര ചെയ്യുന്നതെന്ന് പോലീസ് കണ്ടെത്തി. പിടികൂടിയവരുടെ പേരിൽ കേസ് രജിസ്റ്റർ ചെയ്ത് ജാമ്യത്തിൽ വിട്ടയച്ചു.