കട്ടപ്പനയിലെ അപകടം ; പരിക്കേറ്റ് വഴിയരികിൽ കിടന്ന യുവാക്കളെ ആശുപത്രിയിൽ എത്തിക്കാതിരുന്ന പൊലീസുകാർക്ക് സസ്പെൻഷൻ
പരിക്കേറ്റ് വഴിയരികിൽ കിടന്ന യുവാക്കളെ ആശുപത്രിയിൽ എത്തിക്കാതിരുന്ന പൊലീസുകാർക്ക് സസ്പെൻഷൻ, നെടുംങ്കണ്ടം പൊലീസ് സ്റ്റേഷനിലെ സി പി ഒ മാരായ ആസാദ് എം , അജീഷ് കെ ആർ എന്നിവരെയാണ് അന്വേഷണ വിധേയമായി ഇടുക്കി ജില്ലാ പൊലീസ് മേധാവി സസ്പെന്റ് ചെയ്തത്.കഴിഞ്ഞ 18 ന് കട്ടപ്പന പള്ളികവലയില്‍ വെച്ചായിരുന്നു സംഭവം. പിക്ക് വാന്‍ ഇടിച്ച് ബൈക്ക് യാത്രക്കാരായ കാഞ്ചിയാര്‍ സ്വദേശി ജുബിന്‍, ഇരട്ടയാര്‍ സ്വദേശി അഖില്‍ എന്നിവര്‍ക്ക് പരുക്കേറ്റിരുന്നു. ഈ സമയം സംഭവ സ്ഥലത്ത എത്തിയ നെടുങ്കണ്ടം പോലിസ് സ്റ്റേഷനിലെ ഉദ്യോഗസ്ഥരോട് നാട്ടുകാര്‍ സഹായം അഭ്യര്‍ത്ഥിച്ചെങ്കിലും വാഹനം നിര്‍ത്താതെ പോവുകയായിരുന്നു. സംഭവം അറിഞ്ഞതോടെ റിപ്പോര്‍ട്ട് സമര്‍പ്പിയ്ക്കാന്‍ കട്ടപ്പന ഡിവൈഎസ്പിയോട് ഇടുക്കി ജില്ലാ പോലിസ് മേധാവി ആവശ്യപ്പെട്ടിരുന്നു. പോലിസ് ജീപ്പിലുണ്ടായിരുന്ന ആസാദിനും അജീഷിനും വീഴ്ച പറ്റിയതായാണ് കണ്ടെത്തല്‍. ഇതേ തുടര്‍ന്നാണ് ഇരുവര്‍ക്കുമെതിരെ നടപടിയുണ്ടായിരിക്കുന്നത്
