ചേമ്പളത്ത് ആള്‍ത്താമസമില്ലാത്ത വീട്ടില്‍ മോഷണം
നെടുങ്കണ്ടം: ചേമ്പളത്തിന് സമീപം കൗന്തിയില്‍ ആള്‍താമസമില്ലാത്ത വീട്ടില്‍ മോഷണം. വീട്ടുപകരണങ്ങളും പണി ആയുധങ്ങളും നഷ്ടപെട്ടു. കൗന്തി കാരിവയലില്‍ പ്രസാദിന്റെ വീട്ടിലാണ് കഴിഞ്ഞ ദിവസം രാത്രിയില്‍ മോഷണം നടന്നത്. കുടുംബത്തിനൊപ്പം പ്രസാദ് ജോലി ചെയ്യുന്ന സ്ഥലത്ത് ആയതിനാല്‍ ബന്ധുവിനെയാണ് വീടും കൃഷിയിടവും നോക്കുന്നതിന് ഏല്‍പ്പിച്ചിരിക്കുന്നത്. ഏതാനും ദിവസങ്ങള്‍ക്ക് മുന്‍പ് വീട് വൃത്തിയാക്കുന്നതിനായി ചില വീട്ടുപകരണങ്ങള്‍ വീടിനുള്ളില്‍ നിന്നും വര്‍ക്ക് ഏരിയായിലേക്ക് മാറ്റിയിരുന്നു. ഇവയും, വര്‍ക്ക് ഏരിയായില്‍ സൂക്ഷിച്ചിരുന്ന തൂമ്പ അടക്കമുള്ള പണി ആയുധങ്ങളുമാണ് നഷ്ടപെട്ടത്.പ്രസാദിന്റെ ബന്ധുവായ രതീഷിന്റെ മേല്‍നോട്ടത്തിലാണ് കൃഷിയിടത്തിലെ ജോലികള്‍ ചെയ്യുന്നത്. ഇവര്‍ മിക്ക ദിവസങ്ങളിലും ഇവിടെ വരാറുണ്ട്. രണ്ട് ദിവസം മുന്‍പും ജോലികള്‍ക്കായി എത്തിയപ്പോള്‍ സാധനങ്ങള്‍ വര്‍ക്ക് ഏരിയായില്‍ ഉണ്ടായിരുന്നു. നല്ല ഭാരമുള്ള ഫര്‍ണിച്ചറുകളായിരുന്നതിനാല്‍ ഒന്നിലധികം ആളുകള്‍ ചേര്‍ന്നാണ് മോഷണം നടത്തിയതെന്നാണ് കരുതുന്നത്. കഴിഞ്ഞ ദിവസം മേഖലയില്‍, രാത്രിയില്‍ ശക്തമായ മഴ പെയ്തിന്റെ മറ പറ്റിയാവാം മോഷണം നടന്നതെന്നും സംശയിക്കുന്നു. സംഭവത്തില്‍ രതീഷ് നെടുങ്കണ്ടം പോലിസില്‍ പരാതി നല്‍കി.
