മന്ത്രിയായ ശേഷം ആദ്യമായി ജില്ലയിലെത്തിയ റോഷി അഗസ്റ്റിന് ആവേശോജ്ജ്വല സ്വീകരണം: പാർട്ടി ഓഫിസിൽ റോഷിയെ മാലയിട്ട് സ്വീകരിച്ചു

മന്ത്രിയായ ശേഷം ജന്മനാടായ കോട്ടയം ജില്ലയിൽ ആദ്യമായി എത്തിയ റോഷി അഗസ്റ്റിൻ എം.എൽ.എയ്ക്ക് ആവേശോജ്വല സ്വീകരണം. പാർട്ടി ഓഫിസിൽ എത്തിയ റോഷിയെ കേരള കോൺഗ്രസ് എം ചെയർമാൻ ജോസ് കെ.മാണി മാലയിട്ടാണ് സ്വീകരിച്ചത്.
തിരുവനന്തപുരത്തെ ഔദ്യോഗിക പരിപാടികൾക്കിടെയാണ് റോഷി അഗസ്റ്റിൽ ഇന്നലെ രാവിലെ ജില്ലയിലേയ്ക്കു തിരിച്ചത്. ജില്ലയിൽ എത്തിയ ശേഷം സ്ഥിരം കേന്ദ്രമായ സംക്രാന്തിയിലെ ഇന്ത്യൻ കോഫിഹൗസിനു മുന്നിലെത്തി. മന്ത്രിയായതിന്റെ ജാഡകളൊന്നുമില്ലാതെ, കോഫി ഹൗസിനു മുന്നിൽ നിന്ന് ഒരു കാപ്പികുടി. ഇരുന്ന് ഭക്ഷണം കഴിക്കാൻ അവസരമില്ലാതിരുന്നതിനാൽ കോഫി ഹൗസിനു മുന്നിൽ നിന്നായിരുന്നു ഭക്ഷണം കഴിച്ചത്.
തുടർന്നു നേരെ പോയത് ചേർപ്പുങ്കൽ പള്ളിയിലേയ്ക്കായിരുന്നു. പള്ളിയ്ക്കു മുന്നിൽ നിന്ന് അൽപനേരം കണ്ണടച്ച് പ്രാർത്ഥിച്ചു. തുടർന്നു ഇവിടെ നിന്നും പാലാ കത്തീഡ്രൽ പള്ളിയിൽ എത്തി പാർട്ടി ചെയർമാനും പ്രിയ നേതാവുമായിരുന്ന കെ.എം മാണിയുടെ കല്ലറയിൽ പൂക്കൾ അർപ്പിച്ചു പ്രാർത്ഥിച്ചു. തോമസ് ചാഴികാടൻ എം.പി, എം.എൽ.എമാരായ എൻ.ജയരാജ്, ജോബ് മൈക്കിൾ, അഡ്വ.സെബാസ്റ്റിയൻ കുളത്തുങ്കൽ, പ്രമോദ് നാരായണൻ എന്നിവർ ഒപ്പമുണ്ടായിരുന്നു.
തുടർന്നു പാലായിലെ പാർട്ടി ചെയർമാൻ ജോസ് കെ.മാണിയുടെ വീട്ടിലെത്തി. ഇവിടെ എത്തിയ മന്ത്രിയെ ആശ്ലേഷിച്ചാണ് ജോസ് കെ.മാണി സ്വീകരിച്ചത്. തുടർന്ന്, വീട്ടിലെത്തി ആഘോഷത്തിന്റെ ഭാഗമായി കുടുംബാംഗങ്ങൾക്കൊപ്പം കേക്ക് മുറിച്ചു. ഇവിടെ നിന്നും ഉച്ചഭക്ഷണം കഴിച്ച ശേഷം ചക്കാമ്പുഴയിലെ കുടുംബവീട്ടിൽ എത്തി. ഇവിടെ മാതാപിതാക്കളിൽ നിന്നും അനുഗ്രഹം തേടി. പിന്നീട്, ഭരണങ്ങാനം എടപ്പാടിയിലുള്ള ഭാര്യാഗൃഹത്തിൽ എത്തിയ മന്ത്രി ബന്ധുക്കളുമായി സൗഹൃദം പങ്കു വച്ചു. വൈകിട്ട് കേരള കോൺഗ്രസ് എം. സംസ്ഥാന കമ്മിറ്റി ഓഫിസിൽ എത്തിയ മന്ത്രിയെ പാർട്ടി ചെയർമാൻ ജോസ് കെ.മാണി മാലയിട്ട് സ്വീകരിച്ചു. തുടർന്നു അവൈലബിൾ കമ്മിറ്റി ചേർന്നു.ചെയർമാൻ ജോസ് കെ മാണി, മന്ത്രി റോഷി ആഗസ്റ്റിൻ തോമസ് ചാഴികാടൻ എം പി, എം എൽ എ മാർ,സ്റ്റീഫൻ ജോർജ്,ജില്ലാ പഞ്ചായത്ത് പ്രസിഡന്റ് നിർമ്മല ജിമ്മി, കേരള കോൺഗ്രസ് ജില്ലാ പ്രസിഡന്റ് സണ്ണി തെക്കേടം, വിജി എം.തോമസ്, ജെന്നിങ്‌സ് ജേക്കബ്,ജോസഫ് ചാമക്കാല,ജോജി കുറത്തിയാടൻ എന്നിവർ പങ്കെടുത്തു.