കോട്ടയം നഗരത്തിൽ അർധരാത്രി 40 കാരിക്ക് വെട്ടേറ്റു; ഗുരുതര പരിക്ക്, ഇടുക്കി കട്ടപ്പന സ്വദേശിയുൾപ്പെടെ രണ്ട് പേർ പോലീസ് കസ്റ്റഡിയിൽ

കോട്ടയം ബസേലിയോസ് കോളജ് ജംക്ഷന് സമീപം നടുറോഡിൽ അർധരാത്രിക്കു ശേഷം സ്ത്രീയെ വെട്ടിക്കൊലപ്പെടുത്താൻ ശ്രമം. കഴുത്തിന് വെട്ടേറ്റു കിടന്ന സ്ത്രീയെ വെസ്റ്റ് പൊലീസ് ആംബുലൻസിൽ ജനറൽ ആശുപത്രിയിൽ എത്തിച്ചു. സംഭവത്തിൽ ഇടുക്കി കട്ടപ്പന സ്വദേശി ബാബു (ചുണ്ടെലി ബാബു), എരുമേലി സ്വദേശി രാജു എന്നിവരെ പോലീസ് കസ്റ്റഡിയിൽ എടുത്തു.

ഇന്നലെ രാത്രി 12.30ന് ആണു സംഭവം. മദ്യലഹരിയിലാണ് ആക്രമണം നടത്തിയതെന്നാണ് വിവരം. കടത്തിണ്ണകളിൽ അന്തിയുറങ്ങാറുള്ള ബിന്ദു (40) എന്ന സ്ത്രീക്കാണ് വെട്ടേറ്റതെന്നും കൂടെ താമസിച്ചിരുന്ന ആളാണ് ബാബുവെന്നും പൊലീസ് പറഞ്ഞു. ഒട്ടേറെ ക്രിമിനൽ കേസുകളിൽ പ്രതിയായ ബാബു കാപ്പ നിയമപ്രകാരം ജയിലിലായിരുന്നു. കഴിഞ്ഞദിവസമാണ് പുറത്തിറങ്ങിയത്. ജനറൽ ആശുപത്രിയിൽ പ്രഥമ ശുശ്രൂഷയ്ക്കു ശേഷം ബിന്ദുവിനെ മെഡിക്കൽ കോളജ് ആശുപ്രതിയിലേക്കു മാറ്റി. നില ഗുരുതരമാണ്.