സിനിമ സ്റ്റൈലിൽ തമിഴ്നാട് കോയമ്പത്തൂർ പൊലീസിന്റെ ചന്ദന വേട്ട
തമിഴ്നാട് കോയമ്പത്തൂര്‍ പൊലീസിന്റെ വൻ ചന്ദന വേട്ട. പുഷ്പ സിനിമാ മോഡലിൽ മലപ്പുറത്ത് നിന്നും ആന്ധ്രയിലേക്ക് കടത്തുകയായിരുന്ന 1051 കിലോ ചന്ദന കട്ടിയാണ് പിടികൂടിയത്. കര്‍ണ്ണാടക രജിസ്ട്രേഷൻ വാഹനത്തില്‍ കടത്തിയ ചന്ദനം, സേലം കൊച്ചി ദേശീയ പാതയില്‍ വെള്ളലൂര്‍ ഭാഗത്ത് നിന്നാണ് പിടിച്ചത്. വാഹനം ഓടിച്ച ഡ്രൈവര്‍ മനോജിനെ അറസ്റ്റ് ചെയ്തു.
സേലം കൊച്ചി ദേശീയ പാതയില്‍ പതിവ് വാഹന പരിശോധനക്കിടെ വാഹനം നിര്‍ത്താതെ പോയതോടെ പൊലീസ് പിന്തുടര്‍ന്ന് പിടികൂടുകയായിരുന്നു. തുടര്‍ന്ന് നടത്തിയ പരിശോധനയില്‍ ലോറിയില്‍ പ്രത്യേക അറയില്‍ ഒളിപ്പിച്ച നിലയിലാണ് ചന്ദന മുട്ടികള്‍ കണ്ടെത്തിയത്. 57 ചാക്കിലായിട്ടാണ് ചന്ദനം കണ്ടെത്തിയത്. മലപ്പുറത്ത് നിന്ന് ചെന്നൈ വഴി ആന്ധ്രയിലേക്ക് കൊണ്ടു പോവുകയായിരുന്നു ചന്ദനമെന്ന് അറസ്റ്റിലായ ഡ്രൈവര്‍ പൊലീസിനോട് പറഞ്ഞു. കോയമ്ബത്തൂര്‍ പൊലീസ് പിടികൂടിയ ചന്ദനം വനം വകുപ്പിന് കൈമാറി.
