സ്പോര്ട്സ് കൗണ്‍സില്‍ കായിക സെമിനാര്‍ ജൂലൈ 15 ന്
സംസ്ഥാനത്തൊട്ടാകെ കോര്‍പ്പറേഷന്‍, മുന്‍സിപ്പല്‍, ഗ്രാമപഞ്ചായത്ത് തലങ്ങളില്‍ സ്പോര്ട്സ് കൗണ്‍സിലുകള്‍ രൂപീകരിച്ചതിന്റെ ഭാഗമായി ജില്ലയിലെ സ്പോര്ട്സ് കൗണ്‍സിലുകളുടെ പ്രവര്‍ത്തനം വിലയിരുത്തുന്നതിനും പദ്ധതികള്‍ ആവിഷ്‌കരിക്കുന്നതിനും ജില്ലാപഞ്ചായത്ത് ഹാളില്‍ ആലോചനായോഗം ചേര്‍ന്നു. ജില്ലാ സ്പോര്‍ട്സ്‌കൗണ്‍സില്‍ പ്രസിഡന്റ് റോമിയോ സെബാസ്റ്റ്യന്‍ യോഗം ഉദ്ഘാടനം ചെയ്തു. ജില്ലയിലെ കായിക വികസനത്തിന് ഊന്നല്‍ നല്‍കി പദ്ധതികള്‍ ആവിഷ്‌കരിക്കേണ്ടതിന്റെ ആവശ്യകത അദ്ദേഹം വിശദീകരിച്ചു. ജൂലൈ 15 ന് രാവിലെ 10 ന് ജലവിഭവ വകുപ്പ് മന്ത്രി റോഷി അഗസ്റ്റിന്റെ അധ്യക്ഷതയില്‍ ജില്ലാ പഞ്ചായത്ത് ഹാളില്‍ ജില്ലാ സ്പോര്ട്സ് കൗണ്‍സിലില്‍ ഭാരവാഹികള്‍, ജില്ലയിലെ കായിക അസോസിയേഷന്‍ ഭാരവാഹികള്‍, കോര്‍പ്പറേഷന്‍, മുന്‍സിപ്പല്‍, ഗ്രാമപഞ്ചായത്ത് പ്രസിഡന്‍ുമാര്‍, സെക്രട്ടറിമാര്‍, മറ്റ് സ്പോര്ട്സ് അഭ്യൂദായാകാംക്ഷികള്‍, കായികാധ്യാപകര്‍, ജനപ്രതിനിധികള്‍ തുടങ്ങിയവരെ ഉള്‍പ്പെടുത്തി വിപുലമായി കായികസെമിനാര്‍ സംഘടിപ്പിക്കാന്‍ യോഗത്തില്‍ തീരുമാനിച്ചു.
ജില്ലാ പഞ്ചായത്ത് അംഗം കെ.ജിസത്യന്‍ യോഗത്തില്‍ അധ്യക്ഷത വഹിച്ചു. ജില്ലാ സ്പോര്ട്സ് കൗണ്‍സില്‍ സെക്രട്ടറി ഷൈന്‍ എന്‍.പി സ്വാഗതവും ജില്ലാ സ്പോര്ട്സ് കൗണ്‍സില്‍ എക്സീക്യൂട്ടിവ് അംഗം അനസ് ഇബ്രാഹിം നന്ദിയും പറഞ്ഞു. ജില്ലാ സ്പോര്ട്സ് അസോസിയേഷന്‍ ഭാരവാഹികള്‍, ജില്ലാ സ്പോര്ട്സ് കൗണ്‍സിലില്‍ രജിസ്റ്റര്‍ ചെയ്തിട്ടുളള വിവിധ ക്ലബ്ബുകളുടെ ഭാരവാഹികള്‍, ജില്ലാ സ്പോര്ട്സ് ഓഫീസര്‍ ദീപ്തിമരിയ ജോസ് തുടങ്ങിയവര്‍ യോഗത്തില്‍ പങ്കെടുത്തു.
