റഫറിയുടെ തീരുമാനങ്ങൾ നിരാശരാക്കുന്നു; വിമർശനവുമായി ബ്ലാസ്റ്റേഴ്സ് പരിശീലകൻ വുകോമനോവിച്ച്

കൊച്ചി : ഹൈദരാബാദ് എഫ്സിക്കെതിരെ കൊച്ചി സ്റ്റേഡിയത്തിൽ നടന്ന മത്സരത്തിൽ എതിരില്ലാത്ത ഒരു ഗോളിനാണ് ബ്ലാസ്റ്റേഴ്സ് പരാജയപ്പെട്ടത്. ബ്ലാസ്റ്റേഴ്സ് നേരത്തെ പ്ലേ ഓഫ് ഉറപ്പിച്ചതിനാൽ മത്സരത്തിൻ്റെ ഫലം അപ്രസക്തമായിരുന്നു.

മത്സരത്തിലെ റഫറി തീരുമാനങ്ങൾ പലപ്പോഴും ബ്ലാസ്റ്റേഴ്സ് ആരാധകരെ അസംതൃപ്തരാക്കിയിട്ടുണ്ട്. മത്സരത്തിൽ 4 ബ്ലാസ്റ്റേഴ്സ് താരങ്ങൾക്ക് മഞ്ഞ കാർഡ് നൽകി. മത്സരത്തിൽ മഞ്ഞ കാർഡ് കാണിച്ചതിനെ തുടർന്ന് ഉക്രേനിയൻ സൂപ്പർ താരം ഇവാൻ കാലിയൂഷ്നി പ്ലേ ഓഫിൽ നിന്ന് സസ്പെൻഷനിലായി. അതേസമയം, കാലിയൂഷ്നിക്ക് മഞ്ഞ കാർഡ് നൽകിയത് തെറ്റായ തീരുമാനമാണെന്ന് ബ്ലാസ്റ്റേഴ്സ് പരിശീലകൻ ഇവാൻ വുകോമനോവിച്ച് പറഞ്ഞു. മത്സരത്തിലെ റഫറിംഗ് തീരുമാനങ്ങൾക്കെതിരെയും ഇവാൻ തുറന്നുപറഞ്ഞു.

തന്‍റെ അഭിപ്രായത്തിൽ കാലിയൂഷ്നിക്ക് മഞ്ഞ കാർഡ് നൽകരുതായിരുന്നു. റഫറിയുടെ അത്തരം തീരുമാനങ്ങളിൽ തങ്ങൾ നിരാശരാണ്. ഈ ഒരു മത്സരത്തിൽ മാത്രമല്ല, സീസണിലുടനീളം, റഫറിയുടെ തെറ്റുകളെക്കുറിച്ച് കൂടുതൽ പറയാതിരിക്കുന്നതാണ് നല്ലത്. കഴിഞ്ഞ സീസൺ ആരംഭിക്കുന്നതിന് മുമ്പ് റഫറിയിംഗ് കാര്യം മെച്ചപ്പെടുത്താൻ ഒരു മീറ്റിംഗ് ഉണ്ടായിരുന്നു. എന്നിട്ടും സംഭവിക്കുന്നത് ഇങ്ങനെയാണ്. ഇതുമായി പൊരുത്തപ്പെടുക എന്നതാണ് ഒരേയൊരു മാർഗമെന്നും ഇവാൻ പറഞ്ഞു.