കൃത്രിമ ഉപഗ്രഹങ്ങളുടെ വർദ്ധനവ്; ബഹിരാകാശ ദൗത്യങ്ങൾക്ക് വെല്ലുവിളിയാകുമെന്ന് മുന്നറിയിപ്പ്

ഭൂമിക്ക് ചുറ്റും കൃത്രിമ ഉപഗ്രഹങ്ങളുടെ എണ്ണം വർദ്ധിക്കുന്നത് ബഹിരാകാശ ശാസ്ത്ര ദൗത്യങ്ങൾക്ക് വെല്ലുവിളിയാകുമെന്ന് വിദഗ്ധർ. ഇവ രാത്രി ആകാശത്ത് തടസ്സങ്ങൾ സൃഷ്ടിക്കുമെന്നും അതിനാൽ ജ്യോതിശാസ്ത്രജ്ഞർക്ക് നക്ഷത്രങ്ങളെ നിരീക്ഷിക്കാൻ കഴിയാതെ വരുമെന്നും മുന്നറിയിപ്പ് നൽകി.

ഏകദേശം 8,000 കൃത്രിമ ഉപഗ്രഹങ്ങൾ ഭൂമിയെ പരിക്രമണം ചെയ്യുന്നുണ്ടെന്നാണ് കണക്ക്. 2019 മുതൽ ഇവയുടെ എണ്ണത്തിൽ നാലിരട്ടി വർദ്ധനവാണ് ഉണ്ടായിരിക്കുന്നത്. വാണിജ്യ ബഹിരാകാശ വ്യവസായം വികസിക്കുന്നതിനനുസരിച്ച് ഉപഗ്രഹങ്ങളുടെ എണ്ണം ഇനിയും വർദ്ധിക്കുമെന്നാണ് പ്രതീക്ഷിക്കുന്നത്.

ആഗോളതലത്തിൽ, 400,000 ഉപഗ്രഹങ്ങൾക്ക് ഇതിനകം ഭൂമിയുടെ താഴ്ന്ന ഭ്രമണപഥത്തിൽ അനുമതി നൽകിയിട്ടുണ്ട്. ഈ ഉപഗ്രഹങ്ങളുടെ പ്രയോജനങ്ങൾ നിരവധിയാണെങ്കിലും അവ മൂലമുണ്ടാകുന്ന ദുരന്തത്തെക്കുറിച്ചാണ് വിദഗ്ധർ മുന്നറിയിപ്പ് നൽകുന്നത്.