മുരിക്കാശേരി പാവനാത്മ കോളേജിൽ ജോബ് ഫെയർ 2023 ജനുവരി 28 ന്
കേരളത്തിലെ അഭ്യസ്തവിദ്യരായ യുവജനങ്ങൾക്ക് പ്രമുഖ സ്വകാര്യ തൊഴിൽ സ്ഥാപനങ്ങളിലൂടെ തൊഴിൽ നൽക്കുകയും അതു വഴി തൊഴിലില്ലായ്മ എന്ന സാമൂഹിക പ്രശ്നത്തിന് ഒരു ശാശ്വത പരിഹാരം കാണുക എന്ന ലക്ഷ്യത്തോടെ നാഷണൽ എംപ്ലോയ്മെന്റ് സർവ്വീസ് വകുപ്പ് സംസ്ഥാനം ഒട്ടാകെ തൊഴിൽ മേളകൾ സംഘടിപ്പിച്ചു വരുന്നതിന്റെ ഭാഗമായാണ് മുരിക്കാശേരി പാവനാത്മ കോളേജിൽ ജോബ് ഫെയർ 2023 സംഘടിപ്പിക്കുന്നത്. ഇടുക്കി ജില്ലാ എംപ്ലോയ്മെന്റ് എക്സ്ചേഞ്ചും, മുരിക്കാശേരി പാവനാത്മ കോളേജും സംയുക്തമായാണ് തൊഴിൽമേള സംഘടിപ്പിക്കുന്നത്. കോളേജ് ഓഡിറ്റോറിയത്തിൽ നടക്കുന്ന പരിപാടി രാവിലെ 10.00 ന് ജലവിഭവ വകുപ്പ് മന്ത്രി റോഷി അഗസ്റ്റിൻ ഉത്ഘാടനം ചെയ്യും. വാത്തിക്കുടി ഗ്രാമ പഞ്ചായത്ത് പ്രസിഡന്റ് സിന്ധു ജോസ് ചടങ്ങിൽ അദ്ധ്യക്ഷത വഹിക്കും. സെയിൽസ്, മാർക്കറ്റിംഗ് , ബാങ്കിംഗ്, ആരോഗ്യം, വിദ്യാഭ്യാസം, ഓട്ടോ മൊബൈൽ തുടങ്ങി വിവിധ മേഖലകളിലെ 15 ഉദ്യോഗദായകർ മേളയിൽ പങ്കെടുക്കും.
