എംജി സര്‍വകലാശാല യൂണിയന്റെ നാടകോത്സവം കട്ടപ്പന ഗവ. കോളേജില്‍ തുടങ്ങി
എംജി സര്‍വകലാശാല യൂണിയന്റെ നാടകോത്സവം കട്ടപ്പന ഗവ. കോളേജില്‍ തുടങ്ങി. നാടക കലാകാരന്‍ മുഹമ്മദ് പേരാമ്പ്ര ഉദ്ഘാടനം ചെയ്തു. സര്‍വകലാശാല യൂണിയന്‍ ചെയര്‍പേഴ്സണ്‍ ജിനീഷ രാജന്‍ അധ്യക്ഷയായി. എംജി സര്‍വകലാശാല സിന്‍ഡിക്കേറ്റ് അംഗം ഡോ. കെ എം സുധാകരന്‍, ഡിഎസ്എസ് ഡയറക്ടര്‍ എബ്രഹാം കെ സാമുവേല്‍, അഡ്മിനിട്രേറ്റീവ് ഓഫീസര്‍ പി എം ബാബു, യൂണിയന്‍ ജനറല്‍ സെക്രട്ടറി യദു കൃഷ്ണന്‍ എന്നിവര്‍ സംസാരിച്ചു. സംഘാടക സമിതി ജനറല്‍ കണ്‍വീനര്‍ ടോണി കുര്യക്കോസ് സ്വാഗതവും പ്രോഗ്രാം കമ്മിറ്റി കണ്‍വീനര്‍ ലിനു ജോസ് നന്ദിയും പറഞ്ഞു.
‘ധീരോദാത്തം: നാടക, നായക ലക്ഷണങ്ങളല്ല, ഓര്‍മയില്‍ ജ്വലിക്കും ധീരതയാണ്’ എന്ന പേരില്‍ സംഘടിപ്പിക്കുന്ന പരിപാടിയിലെ ആദ്യ നാടകം ആലുവ ബിഎംസി അവതരിപ്പിച്ചു. 15 കോളേജുകളുടെ നാടകങ്ങള്‍ ആദ്യദിനത്തില്‍ അരങ്ങേറി. ബുധന്‍ പകല്‍ മൂന്നിന് ദേശത്തുടി ഫ്ളോക് ബാന്‍ഡിന്റെ നാടന്‍പാട്ടും ദൃശ്യാവിഷ്‌കാരവും നടക്കും. വൈകിട്ട് പുനരാരംഭിക്കുന്ന നാടകോത്സവത്തില്‍ 17 കോളേജുകള്‍ കൂടി നാടകങ്ങള്‍ അവതരിപ്പിക്കും. വ്യാഴാഴ്ച രാവിലെ വിധികര്‍ത്താക്കള്‍ മികച്ച നാടകം പ്രഖ്യാപിക്കും.
