ദക്ഷിണേന്ത്യയിലെ ഏറ്റവും വലിയ ഗണപതി ശില്‍പം ഇടുക്കി വണ്ടന്‍മേട്ടില്‍!
ഇടുക്കി: തേക്കടി-മൂന്നാര്‍ റോഡില്‍ ആമയാറിന് സമീപം വണ്ടന്മേട് ശ്രീ മഹാണപതി ക്ഷേത്രത്തിൻ്റെ ഭാഗമായി നിര്‍മിച്ചിരിക്കുന്ന ഗണപതി ശില്‍പം വിസ്മയകാഴ്ചയാവുന്നു. ദക്ഷിണേന്ത്യയിലെ ഏറ്റവും വലിയ ഗണപതി ശില്‍പമാണിത്. 38 അടി ഉയരമുള്ള വിഗ്രഹം നിര്‍മിച്ചിരിക്കുന്നത് സിമന്റും കമ്പിയും ഉപയോഗിച്ചാണ്. 32 ലക്ഷം രൂപ ചെലവില്‍ ആറ് വര്‍ഷം കൊണ്ടാണ് നിര്‍മ്മാണം പൂര്‍ത്തിയാക്കിയത്. പ്രശസ്ത ശില്‍പി ചേര്‍ത്തല എരമല്ലൂര്‍ ശിവാനന്ദനാണ് വിഗ്രഹം നിര്‍മിച്ചത്. ഏലയ്ക്ക കൊണ്ട് ഭഗവാന് പറ സമര്‍പ്പിക്കുന്ന ഭാരതത്തിലെ ആദ്യ ക്ഷേത്രമാണ് വണ്ടന്മേട്ടിലേത്. ഗണപതി ശിൽപത്തിൻ്റെ നിര്‍മാണ വേളയില്‍ ശില്‍പി രോഗബാധിതനായതും സാമ്പത്തിക ബുദ്ധിമുട്ടുകളും വിഗ്രഹ നിര്‍മാണത്തിന് തടസമായിരുന്നു. ഇതെല്ലാം മറികടന്നാണ് 2018 ൽ വിഗ്രഹം നാടിന് സമര്‍പ്പിച്ചത്.
തേക്കടി, മൂന്നാർ എന്നിവിടങ്ങളിലേക്ക് പോകുന്ന വിനോദസഞ്ചാരികൾ ഇവിടെ സമയം ചിലവഴിക്കുകയും ഗണപതി ശിൽപത്തിൻ്റെ ചിത്രം പകർത്തുകയും ചെയ്യാറുണ്ട്. ഗണപതി മൂലപ്രതിഷ്ഠയായിട്ടുള്ള ഇടുക്കി ജില്ലയിലെ ഏകക്ഷേത്രമാണിത്. ഗണപതി പ്രധാന പ്രതിഷ്ഠയായതിനാല്‍ ഗണേശ ചതുര്‍ത്ഥിക്ക് പ്രത്യേക പൂജകളും മറ്റും നടക്കുന്നു. ആറാട്ടിനോട് അനുബന്ധിച്ച് ഏലക്ക വ്യാപാരികള്‍ ഏലം കൊണ്ടുള്ള പറയും ഭക്തജനങ്ങള്‍ നാണയം കൊണ്ടുള്ള പറയും കാണിക്കയായി സമര്‍പ്പിക്കും. ദക്ഷിണേന്ത്യയിലെ ഏറ്റവും വലിയ ഗണപതി വിഗ്രഹത്തെ പറ്റി കേട്ടറിഞ്ഞ് വിവിധ സംസ്ഥാനങ്ങളില്‍ നിന്നടക്കം നിരവധി ആളുകളാണ് ഇവിടേക്ക് എത്തുന്നത്.
