ലോക വിനോദ സഞ്ചാര ദിനം:ജില്ലയില്‍ വിപുലമായ ആഘോഷം
ലോക വിനോദസഞ്ചാര ദിനമായ സെപ്റ്റംബര്‍ 27 വിനോദസഞ്ചാര വകുപ്പിന്റെ നേതൃത്വത്തില്‍ വിപുലമായ പരിപാടികളോടെ ജില്ലയില്‍ ആഘോഷിക്കും. ജില്ലാ ഭരണകൂടത്തിന്റെയും ഇടുക്കി ഡി.ടി.പി.സിയുടെയും സംയുക്താഭിമുഖ്യത്തില്‍ സംഘടിപ്പിക്കുന്ന പരിപാടികളുടെ ജില്ലാതല ഉദ്ഘാടം വെള്ളപ്പാറയില്‍ ചൊവ്വാഴ്ച രാവിലെ 10.30 ന് ജില്ലാ കളക്ടര്‍ ഷീബ ജോര്‍ജ്ജ് നിര്‍വഹിക്കും. ജില്ലാ പഞ്ചായത്ത് പ്രസിഡന്റ് ജിജി കെ. ഫിലിപ്പ് ടൂറിസംദിന സന്ദേശം നല്‍കും. തുടര്‍ന്ന് കുടുംബശ്രീയുടെയും, ഗവ.എഞ്ചിനീയറിംഗ് കോളേജ് എന്‍.എസ്.എസ്. യൂണിറ്റിന്റെയും സഹകരണത്തോടെ കൊലുമ്പന്‍ സമാധി മുതല്‍ ഹില്‍വ്യൂ പാര്‍ക്ക് വരെ പാതയോരം വൃത്തിയാക്കുകയും പൂച്ചെടികള്‍ നട്ടുപിടിപ്പിക്കുകയും ചെയ്യും.
ഇടുക്കി ജില്ലാ സ്‌പോര്‍ട്‌സ് കൗണ്‍സിലിന്റെയും ജില്ലാ വോളിബോള്‍ അസോസിയേഷന്റെയും ആഭിമുഖ്യത്തില്‍ 3 മണിക്ക് മുട്ടം ടൗണ്‍ മുതല്‍ മലങ്കര ടൂറിസം ഹബ്ബ് വരെ സ്‌പോര്‍ട്‌സ് ടൂറിസം പ്രമോഷന്‍ റാലി സംഘടിപ്പിക്കും. ജില്ലാ പോലീസ് മേധാവി വി.യു. കുര്യാക്കോസ് ഫ്‌ലാഗ് ഓഫ് നിര്‍വ്വഹിക്കും. ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് റോമിയോ സെബാസ്റ്റ്യന്‍ ടൂറിസംദിന സന്ദേശം നല്‍കും.
വിനോദസഞ്ചാര കേന്ദ്രമായ മൂന്നാറില്‍ പള്ളിവാസല്‍, മൂന്നാര്‍ ഗ്രാമപഞ്ചായത്തുകളുടെയും കുടുംബശ്രീയുടെയും ടൂറിസം ക്ലബ്ബിന്റെയും ഹോട്ടല്‍ ആന്റ് റിസോര്‍ട്ട് അസോസിയേഷന്‍, അഡ്വഞ്ചര്‍ ടൂര്‍ ഓപ്പറേറ്റേഴ്‌സ്, വ്യാപാരികള്‍, എന്‍.ജി.ഒ എന്നിവരുടെ സംയുക്താഭിമുഖ്യത്തില്‍ പോതമേട് വ്യൂ പോയിന്റ് ശുചീകരിക്കും.
രാജാക്കാട് പഞ്ചായത്തിന്റെയും കുടുംബശ്രീയുടെയും ടൂറിസം ക്ലബ്ബിന്റെയും കുഞ്ചിത്തണ്ണി ഗവ. എച്ച്.എസ്.എസ് ന്റെയും സാന്‍ജൊ കോളേജ് രാജാക്കാടിന്റെയും സംയുക്താഭിമുഖ്യത്തില്‍ ശ്രീനാരായണപുരം ടൂറിസം കേന്ദ്രവും പാതയോരവും ശുചീകരിക്കും.
രാമക്കല്‍മേട്ടില്‍ നെടുംങ്കണ്ടം, കരുണാപുരം ഗ്രാമപഞ്ചായത്തുകളുടെയും കുടുംബശ്രീയുടെയും ബി.എഡ് കോളേജിന്റെയും ടൂറിസം ക്ലബ്ബിന്റെയും സേക്രഡ് ഹേര്‍ട്ട് സ്‌കൂളിന്റെയും സംയുക്താഭിമുഖ്യത്തില്‍ ടൂറിസം സെന്ററും പരിസരവും ശുചീകരിക്കും.
പാഞ്ചാലിമേട്ടില്‍ പെരുവന്താനം ഗ്രാമപഞ്ചായത്തിന്റെയും കുടുംബശ്രീയുടെയും ടൂറിസം ക്ലബ്ബിന്റെയും സംയുക്താഭിമുഖ്യത്തില്‍ ടൂറിസം സെന്ററും പരിസരവും ശുചീകരിക്കും.
ചക്കുപള്ളം ഗ്രാമപഞ്ചായത്തിന്റെയും കുടുംബശ്രീയുടെയും ടൂറിസം ക്ലബ്ബിന്റെയും സംയുക്താഭിമുഖ്യത്തില്‍ അരുവിക്കുഴി ടൂറിസം സെന്ററും പരിസരവും ശുചീകരിക്കും. കുമളിയില്‍ ഗ്രാമപഞ്ചായത്തിന്റെയും കുടുംബശ്രീയുടെയും ടൂറിസം ക്ലബ്ബിന്റെയും മരിയന്‍ കോളേജ് കുട്ടിക്കാനത്തിന്റെയും സംയുതാഭിമുഖ്യത്തില്‍ പ്ലാസ്റ്റിക് രഹിത ടൂറിസം ബോധവത്ക്കരണം, ഫ്‌ലാഷ് മോബ് എന്നിവ സംഘടിപ്പിക്കും. വാഗമണ്ണില്‍ ഏലപ്പാറ ഗ്രാമപഞ്ചായത്തിന്റെയും കുടുംബശ്രീയുടെയും ടൂറിസം ക്ലബ്ബിന്റെയും സംയുക്താഭിമുഖ്യത്തില്‍ ടൂറിസം സെന്ററും പരിസരവും ശുചീകരിക്കുകയും കുട്ടികള്‍ക്കായി പട്ടം പറത്തലും നടത്തും.
