ലോട്ടറി എടുത്ത് ഒന്നാം സമ്മാനം സ്വന്തമാക്കിയിരിക്കുകയാണ് ഇടുക്കി സ്വദേശിയായ രാജീവ്

ഇടുക്കി: ഒരു ദിവസം കൊണ്ട് പലരുടെയും ജീവിതം മാറ്റി മറിക്കാന്‍ വിവിധ ലോട്ടറി ടിക്കറ്റുകള്‍ക്ക് സാധിക്കാറുണ്ട്.

അപ്രതീക്ഷിതമായി ലോട്ടറി അടിച്ചവരും ഒന്നില്‍ കൂടുതല്‍ തവണ ലോട്ടറി എടുത്തവരും ഇക്കൂട്ടത്തില്‍ ഉണ്ടാകും. തങ്ങളുടെ ഭാഗ്യ നമ്ബറുകള്‍ നോക്കിയാണ് പലരും ലോട്ടറി എടുക്കാറ്. ചിലര്‍ ഒരു ബുക്ക് മുഴുവനായി സ്വന്തമാക്കും. ഇത്തരത്തില്‍ ലോട്ടറി എടുത്ത് ഒന്നാം സമ്മാനം സ്വന്തമാക്കിയിരിക്കുകയാണ് ഇടുക്കി സ്വദേശിയായ രാജീവ്.

അക്ഷയ ലോട്ടറിയുടെ 23 ടിക്കറ്റുകളാണ് രാജീവ് എടുത്തത്. അതില്‍ ഒരു ടിക്കറ്റിലൂടെ ഭാ​ഗ്യദേവത ഈ നിര്‍മാണ തൊഴിലാളിയെ തേടി എത്തുക ആയിരുന്നു. 70 ലക്ഷം രൂപയാണ് രാജീവിന് സ്വന്തമായത്. അക്ഷയ ലോട്ടറിയുടെ മറ്റൊരു ടിക്കറ്റിനു സമാശ്വാസ സമ്മാനമായ 8,000 രൂപയും ലഭിച്ചിട്ടുണ്ട്.

സ്ഥിരമായി ലോട്ടറി ടിക്കറ്റ് എടുക്കുന്ന ആളാണ് രാജീവ്. ദിവസവും 10 ടിക്കറ്റുകള്‍ വരെ എടുക്കാറുള്ള ആളാണ് രാജീവ്. നിലവില്‍ വാടക വീട്ടിലാണ് രാജീവും കുടുംബവും കഴിയുന്നത്. ഭാര്യ ശ്രീജ ബേക്കറി ജീവനക്കാരിയാണ്. അനാമിക, അഭിന എന്നിവരാണ് മക്കള്‍. നാല് പേരടങ്ങുന്ന കുടുംബത്തിന് സ്വന്തമായൊരു വീട് വയ്ക്കണമെന്നാണ് ആഗ്രഹം. സമ്മാനാര്‍ഹമായ ടിക്കറ്റ് രാജീവ് ബാങ്കില്‍ ഏല്‍പ്പിച്ചു.

എല്ലാ ബുധനാഴ്ചയും നറുക്കെടുക്കുന്ന ഭാ​ഗ്യക്കുറിയാണ് അക്ഷയ. 40 രൂപയാണ് ലോട്ടറി ടിക്കറ്റിന്റെ വില. രണ്ടാം സമ്മാനം 5 ലക്ഷം രൂപയാണ്. ലോട്ടറിയുടെ സമ്മാനം 5000 രൂപയില്‍ താഴെയാണെങ്കില്‍ കേരളത്തിലുള്ള ഏത് ലോട്ടറിക്കടയില്‍ നിന്നും തുക കരസ്ഥമാക്കാം. 5000 രൂപയിലും കൂടുതലാണെങ്കില്‍ ടിക്കറ്റും ഐഡി പ്രൂഫും സര്‍ക്കാര്‍ ലോട്ടറി ഓഫീസിലോ ബാങ്കിലോ ഏല്‍പിക്കണം. വിജയികള്‍ സര്‍ക്കാര്‍ ഗസറ്റില്‍ പ്രസിദ്ധീകരിച്ചിരിക്കുന്ന ഫലം നോക്കി ഉറപ്പുവരുത്തുകയും 30 ദിവസത്തിനകം സമ്മാനാര്‍ഹമായ ലോട്ടറി ടിക്കറ്റ് അധികൃതര്‍ മുന്‍പാകെ സമര്‍പ്പിക്കുകയും വേണം.