പള്ളിമുറ്റത്തുനിന്ന് ബൈക്ക് മോഷ്ടിച്ച യുവാക്കള്‍ അറസ്റ്റില്‍
മൂന്നാര്‍: പള്ളിമുറ്റത്തുനിന്ന് ബൈക്ക് മോഷ്ടിച്ച യുവാക്കള്‍ അറസ്റ്റില്‍. തമിഴ്നാട്ടിലെ തേനിയിലേക്ക് കടത്തിയ വാഹനവും കണ്ടെടുത്തു.
സെവന്‍മല എസ്റ്റേറ്റില്‍ പാര്‍വതി ഡിവിഷനിലെ രാമകൃഷ്ണ മൂര്‍ത്തി (19), മൂന്നാര്‍ ഇക്കാനഗര്‍ രാജീവ് ഗാന്ധി കോളനിയില്‍ ആര്‍. വിനു (18) എന്നിവരെയാണ് മൂന്നാര്‍ പൊലീസ് അറസ്റ്റ് ചെയ്തത്.
കഴിഞ്ഞ 18ന് രാത്രി ടൗണിലെ വിജയപുരം സോഷ്യല്‍ സര്‍വിസ് സൊസൈറ്റിയുടെ ഓഫിസിന് മുന്നില്‍ നിര്‍ത്തിയിട്ട ബൈക്കാണ് ഇരുവരും ചേര്‍ന്ന് മോഷ്ടിച്ചത്. അന്നുതന്നെ ബൈക്കുമായി തേനിയിലേക്ക് പോകുകയും സുഹൃത്തിന്റെ വീട്ടില്‍ വെച്ചശേഷം തിരികെ മൂന്നാറിലെത്തുകയും ചെയ്തു.
മൂന്നാര്‍ ഡിവൈ.എസ്.പി കെ.ആര്‍. മനോജിന്റെ നിര്‍ദേശപ്രകാരം നടത്തിയ രഹസ്യ നീക്കത്തിലാണ് പ്രതികളെക്കുറിച്ച്‌ വിവരം ലഭിച്ചത്. എസ്.എച്ച്‌.ഒ മനേഷ് കെ. പൗലോസിന്റെ നേതൃത്വത്തില്‍ പ്രിന്‍സിപ്പല്‍ എസ്.ഐ ഷാഹുല്‍ ഹമീദാണ് പ്രതികളെ അറസ്റ്റ് ചെയ്തത്. ദേവികുളം കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
