അഗ്നിപഥ്; സർക്കാർ നീക്കം ദേശീയ താല്പര്യങ്ങൾക്ക് തന്നെ എതിരെന്ന് എംഎ ബേബി

തിരുവനന്തപുരം: അഗ്നിപഥ് എന്ന പേരിൽ ഇന്ത്യൻ ആർമിയിൽ കരാർ നിയമനം നടത്താനുള്ള സർക്കാർ നീക്കം ദേശീയ താൽപര്യങ്ങൾക്ക് എതിരാണെന്ന് സി.പി.എം പോളിറ്റ് ബ്യൂറോ അംഗം എം.എ ബേബി പറഞ്ഞു. എന്നാൽ സൈന്യത്തിനും തൊഴിൽ രഹിതരായ യുവാക്കൾക്കും വേണ്ടി മെച്ചപ്പെട്ടതെന്തോ ചെയ്യുന്നതുപോലെയാണ് പ്രധാനമന്ത്രി അത് അവതരിപ്പിക്കുന്നത്. 4 വർഷത്തേക്ക് ‘കരാർ സൈനികരെ’ റിക്രൂട്ട് ചെയ്ത് പ്രൊഫഷണൽ സായുധ സേനയെ ഉയർത്താൻ കഴിയില്ല. “പെൻഷൻ പണം ലാഭിക്കുന്നതിനുള്ള ഈ പദ്ധതി നമ്മുടെ പ്രൊഫഷണൽ സായുധ സേനയുടെ ഗുണനിലവാരത്തിലും കാര്യക്ഷമതയിലും ഗുരുതരമായി വിട്ടുവീഴ്ച ചെയ്യും,” അദ്ദേഹം പറഞ്ഞു.

കഴിഞ്ഞ രണ്ട് വർഷമായി ഇന്ത്യൻ സൈന്യത്തിൽ റിക്രൂട്ട്‌മെന്റ് നടന്നിട്ടില്ല. സാധാരണ സൈനികരെ സായുധ സേനയിലേക്ക് റിക്രൂട്ട് ചെയ്യുന്നതിനുപകരം ഈ പദ്ധതി അത്തരം കരാർ സൈനികർക്ക് അവരുടെ നാല് വർഷത്തിന് ശേഷം മറ്റ് തൊഴിൽ സാധ്യതകളൊന്നും നൽകില്ല. അർധസൈനിക വിഭാഗമെന്ന നിലയിൽ പിൻവാതിലിലുടെ യുവ ആർ.എസ്.എസുകാരെ അണിനിരത്താനും സർക്കാർ ഖജനാവിലെ ജനങ്ങളുടെ പണം തന്ത്രപൂർവം ഉപയോഗിക്കാനുമുള്ള കുറുക്കുവഴിയായി ഈ പദ്ധതിയെ കാണണമെന്നും അദ്ദേഹം പറഞ്ഞു. അതാണ് യഥാർത്ഥ ഉദ്ദേശ്യമെങ്കിലും, അത് ഒരു മഹത്തായ കാര്യമാണെന്ന മട്ടിൽ അവതരിപ്പിക്കുന്നവരുടെ ബുദ്ധിശക്തി അംഗീകരിക്കണമെന്നും അദ്ദേഹം കൂട്ടിചേർത്തു.