ഇന്ത്യൻ വനിതാ ക്രിക്കറ്റ് ടീം ശ്രീലങ്കൻ പര്യടനത്തിനൊരുങ്ങുന്നു
ഇന്ത്യൻ വനിതാ ക്രിക്കറ്റ് ടീം ശ്രീലങ്കൻ പര്യടനത്തിനു വേണ്ടി തയ്യാറെടുക്കുന്നു. പരിമിത ഓവർ പര്യടനം അടുത്ത മാസമാണ്. ശ്രീലങ്കയിൽ മൂന്ന് വീതം ഏകദിനങ്ങളും മൂന്ന് ടി20 മത്സരങ്ങളും ഇന്ത്യ കളിക്കും. 2022ലെ വനിതാ ലോകകപ്പിനു ശേഷം ഇന്ത്യയുടെ ആദ്യ അന്താരാഷ്ട്ര പരമ്പരയാണിത്. ജൂൺ 23നു ആരംഭിക്കുന്ന പര്യടനം ജൂലൈ 7നു അവസാനിക്കും.
പര്യടനത്തിനുള്ള ടീമിനെ ഉടൻ പ്രഖ്യാപിക്കും. പുതിയ ഏകദിന ക്യാപ്റ്റനെയും ഭാവിയിലേക്കുള്ള സ്വത്തായി തിരഞ്ഞെടുക്കും. നിലവിലെ ക്യാപ്റ്റനായ മിതാലി രാജ് ടീമിൽ തുടരുമെങ്കിലും അവർ കൂടുതൽ കാലം കളിക്കളത്തിൽ തുടരില്ലെന്ന് ഉറപ്പാണ്. സീനിയർ പേസർ ജുലൻ ഗോസ്വാമിക്ക് ടീമിൽ ഇടം ലഭിക്കുമോയെന്ന് കണ്ടറിയണം. ഈ മാസം നടക്കുന്ന വനിതാ ടി20 ചലഞ്ചിൽ മിതാലി രാജിനും ജുലൻ ഗോസ്വാമിക്കും ഇടം ലഭിച്ചിട്ടില്ല. കഴിഞ്ഞ സീസൺ വരെ വെലോസിറ്റിയുടെ ക്യാപ്റ്റനായിരുന്നു മിതാലി. ഓൾറൗണ്ടർ ദീപ്തി ശർമയാണ് ഈ വർഷം ടീമിനെ നയിക്കുക.
വനിതാ ടി20 ചലഞ്ച് ഈ മാസം 23ൻ ആരംഭിക്കും. ശേഷിക്കുന്ന ലീഗ് മത്സരങ്ങൾ 23, 26 തീയതികളിലും ഫൈനൽ മത്സരങ്ങൾ 28 നും നടക്കും. പൂനെയിലെ എംസിഎ സ്റ്റേഡിയത്തിലാണ് ഫൈനൽ നടക്കുക.
