ഇന്ത്യ ബുക്ക് ഓഫ് റെക്കോര്‍ഡ്‌സില്‍ ഇടം പിടിച്ച് കട്ടപ്പനയുടെ സ്വന്തം സൈനികന്‍

കട്ടപ്പനക്കാര്‍ക്കിത് അഭിമാന നിമിഷം. ഇന്ത്യ ബുക്ക് ഓഫ് റെക്കോര്‍ഡ്‌സില്‍ ഇടം പിടിച്ചിരിക്കുകയാണ് കട്ടപ്പന ശാന്തിഗ്രാം സ്വദേശിയായ ഹവില്‍ദാര്‍ അനിഷ് തോമസ്. ഇന്ത്യന്‍ സൈന്യത്തിന്റെ ബാംഗ്ലൂര്‍ മദ്രാസ് എഞ്ചിനീയറിങ് ഗ്രൂപ്പ് ആന്‍ഡ് സെന്ററില്‍ കളരി ഗുരുക്കളായ അനിഷ് തോമസ് കളരിപ്പയറ്റ് രണ്ട് വടിവീശലിലാണ് റെക്കോര്‍ഡിട്ടത്. 256 കളരി ചുവടില്‍ 2 മിനിറ്റ് 48 സെക്കന്‍ഡില്‍ 320 തവണയാണ് ഇദ്ദേഹം വടി ചുഴറ്റി വീശിയത്. 5 അടി ആറിഞ്ചുള്ള വടികളാണ് ഇതിനായി ഉപയോഗിച്ചത്.

22 വര്‍ഷമായി സൈന്യത്തില്‍ സേവനമനുഷ്ഠിക്കുന്ന ഇദ്ദേഹം ഇപ്പോള്‍ ബാംഗ്ലൂരില്‍ പുതുതായി ചേരുന്ന സൈനികര്‍ക്ക് പരിശീലനം നല്‍കുന്ന ഇന്‍സ്ട്രക്ടര്‍ കൂടിയാണ്.
ഭാര്യ സോണി തോമസ്, മകള്‍ അമേലിയ റോസ് അനിഷ്, മകന്‍ അമേലിയോ അനിഷ്.