കട്ടപ്പനയിൽ ഓഡിറ്റോറിയത്തിനുള്ളിൽ തീപിടിച്ചു. ഫയർ ഫോഴ്സിന്റെയും, പൊലീസിന്റെയും സമയോചിത ഇടപെടലിൽ വൻ അഗ്നിബാധ ഒഴിവായി.

ഇന്ന് ഉച്ചയ്ക്ക് ശേഷം നാല് മണിയോടെയാണ് കട്ടപ്പന ഇരട്ടയാർ റോഡിലുള്ള കൊച്ചുകുടിയിൽ ഓഡിറ്റോറിയത്തിന് ഉള്ളിൽ ഷോർട്ട് സർക്യൂട്ടിനെ തുടർന്ന് തീ പിടിച്ചത്.വലിയ രീതിയിൽ പുക ഉയരുന്നത് കണ്ട സമീപത്തെ കെ എസ് ഇ ബി ജീവനക്കാരാണ് വിവരം പൊലീസിലും, ഫയർ ഫോഴ്സിലും അറിയിച്ചത്. ഉടൻ സ്ഥലത്തെത്തിയ ഫയർ ഫോഴ്സിന്റെയും, പൊലീസിന്റെയും സമയോചിത ഇടപെടലിൽ വൻ അഗ്നിബാധ ഒഴിവായി. പത്ത് മിനിറ്റിനുള്ളിൽ തീ നിയന്ത്രണ വിധേയമാക്കി. ഷോർട്ട് സർക്യൂട്ടിനെ തുടർന്ന് ഓഡിറ്റോറിയത്തിനുള്ളിലെ കസേരകൾക്ക് തീ പിടിച്ചതാണ് വലിയ പുക ഉയരാൻ കാരണമായത്.തീപിടുത്തമുണ്ടായ ഓഡിറ്റോറിയത്തിന് താഴെ പത്തോളം വ്യാപാര സ്ഥാപനങ്ങൾ പ്രവർത്തിക്കുന്നുണ്ട്.
തീ പടർന്നതറിഞ്ഞതോടെ പ്രദേശത്ത് നിരവധി ആളുകളും തടിച്ചുകൂടി. എത്ര രൂപയുടെ സാധനങ്ങൾ കത്തി നശിച്ചു എന്നതിൽ വ്യക്തതയില്ല.