കട്ടപ്പന ഡി ഇ ഒ ഓഫീസിലെ ഫയലുകൾ സൂക്ഷിക്കുന്നത് ജനറേറ്റർ മുറിയിൽ .

• മിനി സിവിൽ സ്‌റ്റേഷനിലേയ്ക്ക് മാറി പ്രവർത്തനമാരംഭിച്ച് രണ്ട് വർഷം തികയുമ്പോഴും കട്ടപ്പന വിദ്യാഭ്യാസ ജില്ലാ ഓഫീസിന് റെക്കോഡ് റൂമില്ല

• അധ്യാപകരുടെയും, പൂർത്തീകരിക്കുവാനുള്ള നിയമനങ്ങളുടെയും സുപ്രധാന ഫയലുകൾ സൂക്ഷിച്ചിരിക്കുന്നത് മലിന ജലം ചോർന്നൊലിക്കുന്ന താത്കാലിക മുറിയിൽ



കട്ടപ്പന: കട്ടപ്പന വിദ്യാഭ്യാസ ജില്ലാ ഓഫീസിന് റെക്കോഡ് റൂം ഇനിയും അകലെ, വാടക കെട്ടിടത്തിൽ നിന്നും മിനി സിവിൽ സ്‌റ്റേഷനിലേയ്ക്ക് മാറി രണ്ട് വർഷം തികയുമ്പോഴും താത്കാലിക സംവിധാനത്തിലാണ് അധ്യാപകരുടെയും, മറ്റ് നിയമനങ്ങളുടെയും സുപ്രധാന ഫയലുകൾ സൂക്ഷിച്ചിരിക്കുന്നത്. മിനി സിവിൽ സ്‌റ്റേഷന് പിന്നിലെ ജനറേറ്റർ മുറിയാണ് ജില്ലാ വിദ്യാഭ്യാസ ഓഫീസ് റെക്കോഡ് റൂമായി ഇപ്പോൾ ഉപയോഗിക്കുന്നത്. 2019 ഡിസംബർ പത്തിനാണ് മിനി സിവിൽ സ്റ്റേഷൻ ഉദ്ഘാടനം ചെയ്തത്.ഇതിന് ശേഷം അഞ്ച് മാസങ്ങൾ കഴിഞ്ഞാണ് ഡി ഇ ഒ , എ ഇ ഒ ഓഫീസുകൾ ഇവിടേയ്ക്ക് മാറ്റി പ്രവർത്തനം തുടങ്ങിയത്. മിനി സിവിൽ സ്റ്റേഷന്റെ നിർമ്മാണ സമയത്ത് തന്നെ ജില്ലാ വിദ്യാഭ്യാസ ഓഫീസ് ഇവിടേയ്ക്ക് മാറ്റുവാൻ തീരുമാനിച്ചിരുന്നു.എന്നിട്ടും നിർമ്മാണം പൂർത്തീകരിച്ചപ്പോൾ റെക്കോഡ് റൂം അനുവദിച്ചില്ല. കട്ടപ്പന വിദ്യാഭ്യാസ ജില്ലാ ഓഫീസിന് കീഴിൽ വരുന്ന സ്കൂളുകളിലെ അധ്യാപകരുടെ ഫയലുകളും, നിയമന ഫയലുകളുമടക്കം സൂക്ഷിക്കാൻ സൗകര്യമില്ലാതെ വന്നതോടെയാണ് വിദ്യാഭ്യാസ ഓഫീസർ ഭവന നിർമ്മാണ ബോർഡുമായി ബന്ധപ്പെട്ട് സിവിൽ സ്‌റ്റേഷന് പിന്നിലുള്ള ജനറേറ്റർ മുറി താത്കാലികമായി ഏറ്റെടുത്തത്. സ്ഥല പരിമിതി മൂലം ഫയലുകൾ എല്ലാം സൂക്ഷിച്ച് വയ്ക്കാൻ ബുദ്ധിമുട്ടുണ്ടെന്ന് റെക്കോഡ് റൂം കീപ്പർ പറയുന്നു.



ചോർച്ചയ്ക്ക് പരിഹാരമില്ല.

ഫയലുകൾ സൂക്ഷിച്ചിരിക്കുന്ന മുറിയുടെ മുകളിലത്തെ നിലയിലാണ് മിനി സിവിൽ സ്റ്റേഷനിലെ ശുചി മുറി. നിർമ്മാണത്തിലെ അപാകത മൂലം ഇവിടെ നിന്നുള്ള മലിന ജലം മുറിക്കുള്ളിലേയ്ക്ക് ചോരുകയാണ്. ജലം ഫയലുകളിലേയ്ക്ക് വീഴാതിരിക്കാനായി ഉദ്യോഗസ്ഥർ ബക്കറ്റാണ് ആശ്രയിക്കുന്നത്.


റെക്കോഡ് റൂമിലെത്താൻ കാട് താണ്ടണം

മിനിസിവിൽ സ്‌റ്റേഷന്റെ ഒന്നാമത്തെ നിലയിൽ പിന്നിലാണ് ഡി ഇ ഒ ഓഫീസിന്റെ താത്കാലിക റെക്കോഡ് റൂം. പൊന്തക്കാടുകൾ വളർന്ന് നിൽക്കുന്നതിനാൽ ഇവ വകഞ്ഞ് മാറ്റി മലിന ജലത്തിൽ ചവിട്ടി വേണം റെക്കോഡ് റൂമിന്റെ ചുമതലയുള്ള ഉദ്യോഗസ്ഥന് എത്തുവാൻ.ചുറ്റും കാടുകൾ തിങ്ങി നിൽക്കുന്നതിനാൽ ഇവിടെ ഇഴജന്തുക്കളുടെ സാന്നിധ്യവും ഉണ്ട്.