'6 മാസത്തിനുള്ളിൽ വൈഭവ് ഇന്ത്യൻ ടീമിലെത്തും, പുറത്തുപോവുക സഞ്ജുവല്ല, ആ 2 താരങ്ങളിലൊരാള്' പ്രവചനവുമായി കൈഫ്
ലക്നൗ: കൗമാരതാരം വൈഭവ് സൂര്യവംശി അടുത്ത ആറ് മാസത്തിനുള്ളിൽ ഇന്ത്യൻ ടി20 ടീമിൽ സ്ഥാനമുറപ്പിക്കുമെന്ന് മുൻ ഇന്ത്യൻ താരം മുഹമ്മദ് കൈഫ്. വൈഭവ് പ്ലേയിംഗ് ഇലവനിലെത്തുമ്പോള് പുറത്തുപോകുക മലയാളി താരം സഞ്ജു സാംസണായിരിക്കില്ലെന്നും നിലവിലെ വൈസ് ക്യാപ്റ്റൻ തിലക് വർമ്മയ്ക്കോ ഓൾറൗണ്ടർ ശിവം ദുബെയ്ക്കോ ആയിരിക്കും വൈഭവിനായി വഴിമാറേണ്ടി വരികയെന്നും തന്റെ യൂട്യൂബ് ചാനലിൽ സംസാരിക്കവെ കൈഫ് പറഞ്ഞു.
അഫ്ഗാനിസ്ഥാനെതിരായ ടി20 പരമ്പരയിലും ജപ്പാനെതിരായ ഏക ടി20 മത്സരത്തിലും വൈഭവിനെ പ്ലേയിംഗ് ഇലവനില് ഉൾപ്പെടുത്തിയിരുന്നില്ല. എന്നാൽ, ദുലീപ് ട്രോഫിയിലടക്കം മികച്ച പ്രകടനം പുറത്തെടുക്കുന്ന വൈഭവിനെ കൂടുതൽ കാലം ടീം മാനേജ്മെന്റിന് മാറ്റിനിർത്താൻ കഴിയില്ലെന്ന് കൈഫ് ചൂണ്ടിക്കാട്ടി. തിലക് വർമ്മ ടീമിന്റെ വൈസ് ക്യാപ്റ്റനാണെന്ന് എനിക്കറിയാം. എന്നാൽ ഇതിനുമുമ്പും വൈസ് ക്യാപ്റ്റന്മാർ ടീമിൽ നിന്ന് പുറത്തായിട്ടുണ്ട്. ശിവം ദുബെയും റൺസ് കണ്ടെത്തുന്നില്ല, തന്നെയുമല്ല ഫീൽഡിംഗിലെ ബലഹീനതയും പാർട്ട് ടൈം ബൗളിംഗും അദ്ദേഹത്തിന് തിരിച്ചടിയാണ്.
അതിനാൽ അടുത്ത ആറ് മാസത്തിനുള്ളിൽ തിലകയോ ദുബെയോ ഇന്ത്യൻ ടീമില് നിന്ന് പുറത്താകും, പകരം വൈഭവ് പ്ലേയിംഗ് ഇലവനിലെത്തുമെന്നും കൈഫ് വ്യക്തമാക്കി. വീരേന്ദർ സെവാഗിന്റെ അഗ്രസീവ് ബാറ്റിംഗ് ശൈലിയോട് വൈഭവിനെ ഉപമിച്ച കൈഫ്, താരം ഇപ്പോൾ ബൗളിംഗിലും ശ്രദ്ധ കേന്ദ്രീകരിക്കുന്നുണ്ടെന്നും ഇത് ഓൾറൗണ്ടർ എന്ന നിലയിൽ ടീമിന് വലിയ മുതൽക്കൂട്ടാകുമെന്നും കൂട്ടിച്ചേർത്തു.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക
