സ്പൈ ചിത്രങ്ങൾ പുറത്ത്, സ്കോർപിയോയെ ഓർമിപ്പിക്കുന്ന ഡിസൈനുമായി മഹീന്ദ്ര; വരുന്നത് പല ഓപ്ഷനുകളിൽ

ഇന്ത്യൻ വാഹന വിപണിയിൽ പുതിയ പരീക്ഷണങ്ങളുമായി മഹീന്ദ്ര. 2027ലും 2028ലുമായി 2 പുതിയ സബ്-4 മീറ്റർ എസ്‌യുവികൾ അവതരിപ്പിക്കാനുള്ള ഒരുക്കത്തിലാണ് മഹീന്ദ്രയെന്നാണ് റിപ്പോർട്ടുകൾ. വിഷൻ എസ് കൺസെപ്റ്റിനെ അടിസ്ഥാനമാക്കി കരുത്തുറ്റതും ബോക്സി രൂപകൽപ്പനയുള്ളതുമായ ഒരു എസ്‌യുവിയും ഇക്കൂട്ടത്തിലുണ്ടാകും. മഹീന്ദ്രയുടെ പുതിയ എൻ.യു-ഐ.ക്യു മോഡുലാർ പ്ലാറ്റ്‌ഫോമിൽ നിർമിക്കുന്ന ഈ എസ്‌യുവി സ്കോർപിയോ ബ്രാൻഡിന്റെ കരുത്തുറ്റ ഡിസൈൻ പാരമ്പര്യം നിലനിർത്തിക്കൊണ്ടായിരിക്കും എത്തുക. വാഹനത്തിന്റെ പരീക്ഷണയോട്ടവും പുരോഗമിക്കുകയാണ്.

സ്കോർപിയോയെ ഓർമിപ്പിക്കുന്ന ഡിസൈൻ

പുറത്തുവന്ന സ്പൈ ചിത്രങ്ങൾ സൂചിപ്പിക്കുന്നത് ഉൽപ്പാദന പതിപ്പിന് വിഷൻ എസ് കൺസെപ്റ്റിനോട് സാമ്യമുള്ള രൂപകൽപ്പനയായിരിക്കുമെന്നാണ്. ആധുനിക മോഡുലാർ പ്ലാറ്റ്‌ഫോമിലാണ് വാഹനം നിർമിക്കുന്നതെങ്കിലും ചതുരാകൃതിയിലുള്ളതും നിവർന്നുനിൽക്കുന്നതുമായ ബോഡി ഡിസൈൻ എസ്‌യുവിക്ക് കൂടുതൽ കരുത്തുറ്റ രൂപം നൽകുന്നു. പിന്നിൽ വിൻഡ്‌സ്‌ക്രീനിനോട് ചേർന്ന് നേർത്ത എൽ.ഇ.ഡി ടെയിൽ ലാമ്പ് ക്ലസ്റ്ററാണ് നൽകിയിരിക്കുന്നത്. സ്കോർപിയോ ക്ലാസിക്കിന്റെയും സ്കോർപിയോ-എൻന്റെയും ടെയിൽ ലാമ്പുകളുമായി ഇതിന് സാമ്യമുണ്ട്. ടെയിൽഗേറ്റിൽ പൂർണ വലുപ്പത്തിലുള്ള സ്പെയർ വീലും വശത്ത് ഹിഞ്ച് ചെയ്ത പിൻ വാതിലും ലഭിക്കും. വലുതും ചതുരാകൃതിയിലുള്ളതുമായ വീൽ ആർച്ചുകൾ, ഫ്ലഷ് ടൈപ്പ് ഡോർ ഹാൻഡിലുകൾ, കുത്തനെയുള്ള തൂണുകൾ, 16 ഇഞ്ച് അലോയ് വീലുകൾ എന്നിവയും വാഹനത്തിന്റെ ഡിസൈൻ സവിശേഷതകളായിരിക്കും.

ആധുനിക ക്യാബിനുമായി മിനി സ്കോർപിയോ

വിഷൻ എസ് കൺസെപ്റ്റിനെ അടിസ്ഥാനമാക്കിയുള്ള എസ്‌യുവിയിൽ മഹീന്ദ്രയുടെ പുതിയ തലമുറ ഇന്റീരിയർ ഡിസൈൻ പ്രതീക്ഷിക്കാം. പുറത്തുവന്ന സ്പൈ ചിത്രങ്ങളിൽ ആധുനിക ഡിസ്പ്ലേകൾക്കും ഫിസിക്കൽ നിയന്ത്രണങ്ങൾക്കും പ്രാധാന്യം നൽകിയ ക്യാബിൻ ലേഔട്ട് ഇതിനകം വ്യക്തമാണ്. ഇൻഫോടെയ്ൻമെന്റ് സംവിധാനത്തിനും ഇൻസ്ട്രുമെന്റ് ക്ലസ്റ്ററിനുമായി ഏകദേശം 10.25 ഇഞ്ച് വീതമുള്ള 2 സ്ക്രീനുകൾ വാഹനത്തിൽ ലഭിച്ചേക്കും.

ഫിസിക്കൽ കൺട്രോളുകൾക്കൊപ്പം അഡ്രിനോക്‌സ്

മഹീന്ദ്രയുടെ അടുത്ത തലമുറ അഡ്രിനോക്‌സ് സോഫ്റ്റ്‌വെയർ സംവിധാനത്തിൽ പ്രവർത്തിക്കുന്ന സെൻട്രൽ ഇൻഫോടെയ്ൻമെന്റ് സംവിധാനമായിരിക്കും വാഹനത്തിലുണ്ടാകുക. എ.സി വെന്റുകൾക്ക് താഴെയായി ഫിസിക്കൽ ക്ലൈമറ്റ് കൺട്രോൾ ഡയലുകളും എയർക്രാഫ്റ്റ് ശൈലിയിലുള്ള ടോഗിൾ സ്വിച്ചുകളും നൽകിയേക്കും. ഓട്ടോ ഹോൾഡോടുകൂടിയ ഇലക്ട്രോണിക് പാർക്കിംഗ് ബ്രേക്ക്, വയർലെസ് സ്മാർട്ട്‌ഫോൺ ചാർജിംഗ് പാഡ്, ഡ്രൈവ് മോഡ് സെലക്ടർ, മൾട്ടി ഫങ്ഷൻ ലെതറെറ്റ് സ്റ്റിയറിംഗ് വീൽ, പനോരമിക് സൺറൂഫ് തുടങ്ങിയ ഫീച്ചറുകളും പ്രതീക്ഷിക്കുന്നു. പവർഡ്, വെന്റിലേറ്റഡ് ഫ്രണ്ട് സീറ്റുകൾ, ലെവൽ 2 എ.ഡി.എ.എസ്, 6 എയർബാഗുകൾ, ഇലക്ട്രോണിക് സ്റ്റബിലിറ്റി കൺട്രോൾ, ഹിൽ സ്റ്റാർട്ട് അസിസ്റ്റ് തുടങ്ങിയ സുരക്ഷാ സംവിധാനങ്ങളും ലഭിച്ചേക്കും.

പെട്രോൾ, ഡീസൽ, ഹൈബ്രിഡ്; വരുന്നത് പല ഓപ്ഷനുകൾ

പുതിയ മിനി സ്കോർപിയോയിൽ 1.2 ലിറ്റർ എംസ്റ്റാലിയൻ ടർബോ പെട്രോൾ എൻജിനും 1.5 ലിറ്റർ ടർബോ ഡീസൽ എൻജിനും ലഭിച്ചേക്കുമെന്നാണ് റിപ്പോർട്ടുകൾ. എൻ.യു-ഐ.ക്യു പ്ലാറ്റ്‌ഫോമിന് ഐ.സി.ഇ, ഹൈബ്രിഡ്, ഇലക്ട്രിക് പവർട്രെയിനുകളെ പിന്തുണയ്ക്കാൻ സാധിക്കും. 1.2 ലിറ്റർ ടർബോ പെട്രോൾ എൻജിൻ അടിസ്ഥാനമാക്കി ഹൈബ്രിഡ് പവർട്രെയിനും മഹീന്ദ്ര വികസിപ്പിക്കുന്നതായി റിപ്പോർട്ടുകളുണ്ട്.

എക്സ്.യു.വി 3എക്‌സ്ഒയ്ക്ക് ഒപ്പമെത്തും

കൂടുതൽ കരുത്തുറ്റതും ലൈഫ്‌സ്റ്റൈൽ കേന്ദ്രീകൃതവുമായ എസ്‌യുവി എന്ന നിലയിൽ എക്സ്.യു.വി 3എക്‌സ്ഒയ്ക്ക് ഒപ്പമായിരിക്കും പുതിയ മോഡലിന്റെ സ്ഥാനം. ടാറ്റ നെക്‌സോൺ, മാരുതി ബ്രെസ്സ, ഹ്യുണ്ടായി വെന്യു, വരാനിരിക്കുന്ന റെനോ ബ്രിഡ്ജർ തുടങ്ങിയ മോഡലുകളുമായാകും പ്രധാന മത്സരം. മിനി സ്കോർപിയോ 2027ന്റെ തുടക്കത്തിൽ, ഇന്ത്യ മൊബിലിറ്റി ഗ്ലോബൽ എക്‌സ്‌പോയിൽ അവതരിപ്പിച്ചേക്കുമെന്നാണ് റിപ്പോർട്ടുകൾ.