ദുബായിലേക്ക് കയറ്റി അയച്ചത് 1 ടൺ പഴങ്ങൾ! കർഷകർക്ക് കിട്ടിയത് ഇരട്ടി ലാഭം, ഇത് ഇന്ത്യയുടെ ‘മധുരമൂറും കനി’

വടക്കുകിഴക്കൻ ഇന്ത്യയുടെ കാർഷിക മേഖലയ്ക്ക് ചരിത്രപരമായ ഒരു നാഴികക്കല്ല് സമ്മാനിച്ചുകൊണ്ട്, അസമിന്റെ അഭിമാനമായ ഭൗമ സൂചിക പദവിയുള്ള ‘തേസ്പൂർ ലിച്ചി’ ആദ്യമായി രാജ്യാന്തര വിപണികളിലേക്ക് കയറ്റുമതി ചെയ്തു. തേസ്പൂരിലെ ലിച്ചി കൃഷിയുടെ നൂറാം വാർഷികാഘോഷങ്ങളുടെ ഭാഗമായി മൊത്തം 1.6 ടൺ ലിച്ചിയാണ് ദുബായിലേക്കും സിംഗപ്പൂരിലേക്കും അയച്ചത്. കേന്ദ്ര വാണിജ്യ-വ്യവസായ മന്ത്രാലയത്തിന് കീഴിലുള്ള അഗ്രിക്കൾച്ചറൽ ആൻഡ് പ്രോസസ്ഡ് ഫൂഡ് പ്രോഡക്റ്റ്സ് എക്സ്പോർട്ട് ഡെവലപ്മെന്റ് അതോറിറ്റിയുടെ നേതൃത്വത്തിലാണ് ഈ ചരിത്രപരമായ കയറ്റുമതി സാധ്യമാക്കിയത്. വടക്കുകിഴക്കൻ മേഖലയിൽ നിന്നുള്ള പ്രീമിയം കാർഷിക ഉൽപന്നങ്ങൾക്ക് ആഗോളതലത്തിൽ വലിയ വിപണി സാധ്യതകൾ തുറന്നുനൽകുന്നതാണ് ഈ നീക്കം.

∙ നൂറിന്റെ മധുരത്തിൽ ആഗോള വിപണിയിലേക്ക്
തേസ്പൂർ ലിച്ചി കൃഷിയുടെ ശതാബ്ദി ആഘോഷങ്ങളുടെ ഭാഗമായി സോണിത്പൂർ ജില്ലാ ഭരണകൂടം തേസ്പൂർ ജില്ലാ ലൈബ്രറിയിൽ സംഘടിപ്പിച്ച രണ്ടു ദിവസത്തെ ‘തേസ്പൂർ ലിച്ചി ഫെസ്റ്റിവൽ 2026’ നോടനുബന്ധിച്ചായിരുന്നു കയറ്റുമതിയുടെ ഫ്ലാഗ് ഓഫ് കർമം നടന്നത്. വിവിധ ഇനങ്ങളിൽപ്പെട്ട ഒരു ടൺ ലിച്ചി ദുബായിലേക്കും 600 കിലോഗ്രാം ലിച്ചി സിംഗപ്പൂരിലേക്കും കയറ്റി അയച്ചു. സോണിത്പൂർ ഡിസ്ട്രിക്റ്റ് കമ്മിഷണർ ആനന്ദ് കുമാർ ദാസ്, തേസ്പൂർ എംഎൽഎ പൃഥ്വിരാജ് രാഭ, അസം ഗവൺമെന്റ് അഗ്രികൾച്ചർ പ്രൊഡക്ഷൻ കമ്മിഷണർ അരുണ രാജോറിയ, അപെഡ ചെയർമാൻ അഭിഷേക് ദേവ്, ഡിസ്ട്രിക്റ്റ് അഗ്രികൾച്ചർ ഓഫിസർ പ്രദീപ് കുമാർ താലൂക്ദാർ, സദർ അഗ്രികൾച്ചർ ഓഫിസർ സാക്കിർ ഹുസൈൻ, എം/എസ് ഡിഎംആർ ഗ്രീൻ വാലി അഗ്രോ ഫ്രഷ് പ്രൈവറ്റ് ലിമിറ്റഡ് പ്രതിനിധികൾ എന്നിവരുടെ സാന്നിധ്യത്തിലാണ് കൺസൈൻമെന്റുകൾ ഫ്ലാഗ് ഓഫ് ചെയ്തത്. കർഷകരും കയറ്റുമതിക്കാരും ഉദ്യോഗസ്ഥരും ചടങ്ങിൽ പങ്കെടുത്തു.

ഈ നേട്ടത്തെ പ്രകീർത്തിച്ചുകൊണ്ട് കേന്ദ്രമന്ത്രി പിയൂഷ് ഗോയൽ സോഷ്യൽ മീഡിയ പ്ലാറ്റ്‌ഫോമായ എക്‌സിൽ കുറിച്ചതിങ്ങനെ: ‘അസമിന്റെ പ്രശസ്തമായ ജിഐ-ടാഗ് ചെയ്ത തേസ്പൂർ ലിച്ചി ഇപ്പോൾ വിദേശ വിപണികളിലും മധുരം പരത്തുകയാണ്. അപെഡയുടെ പിന്തുണയോടെ തേസ്പൂർ ലിച്ചിയുടെ ആദ്യ കയറ്റുമതി ദുബായിലേക്ക് പുറപ്പെട്ടു. ഈ നടപടി മേഖലയിലെ ലിച്ചി കൃഷിക്ക് ആഗോള അംഗീകാരം നൽകുകയും കർഷകർക്ക് മികച്ച വില ഉറപ്പാക്കുകയും ചെയ്യും. വടക്കുകിഴക്കൻ ഇന്ത്യയിലെ കാർഷിക ഉൽപന്നങ്ങൾക്ക് ഇത് പുതിയ അവസരങ്ങൾ സൃഷ്ടിക്കും.’
∙ എന്തുകൊണ്ട് തേസ്പൂർ ലിച്ചി സവിശേഷമാകുന്നു?
അതുല്യമായ രുചി, സമൃദ്ധമായ പൾപ്പ്, ആകർഷകമായ കടും ചുവപ്പ് നിറം, പ്രത്യേക സുഗന്ധം എന്നിവയ്ക്ക് പേരുകേട്ടതാണ് തേസ്പൂർ ലിച്ചി. ഇതിന്റെ മികച്ച ഗുണനിലവാരം തന്നെയാണ് രാജ്യാന്തര വിപണിയിൽ ഇതിന് പ്രിയമേറാൻ കാരണം. ബോംബെ, ബിലാത്തി, ഇലൈച്ചി, പിയാജി, ചാഹി, ചൈനീസ്, റോംഗിയ, കാത്ത് ബോംബെവ എന്നിങ്ങനെ വൈവിധ്യമാർന്ന ലിച്ചി ഇനങ്ങൾ ഈ മേഖലയിൽ ഉൽപാദിപ്പിക്കപ്പെടുന്നുണ്ട്. ഇവയിൽ ‘ബോംബെ’ ഇനത്തിന് ഇത്തവണ ആഭ്യന്തര വിപണിയിൽ വലിയ ഡിമാൻഡാണ് അനുഭവപ്പെട്ടത്. ഒരു ലിച്ചിക്ക് 40 മുതൽ 50 രൂപ വരെയാണ് വില ലഭിച്ചത്. ലിച്ചി ഫെസ്റ്റിവൽ വേദിയിൽ മാത്രം ഒരൊറ്റ ദിവസം കൊണ്ട് 4 ലക്ഷത്തിലധികം രൂപയുടെ ലിച്ചിയാണ് വിറ്റഴിഞ്ഞത്.
∙ ഒരു നൂറ്റാണ്ടിന്റെ പാരമ്പര്യം
തേസ്പൂരിന്റെ ലിച്ചി കൃഷിക്ക് ഒരു നൂറ്റാണ്ടിന്റെ ചരിത്രമുണ്ട്. 1923ൽ പ്രശസ്ത സാഹിത്യകാരനും തേസ്പൂർ മുനിസിപ്പാലിറ്റിയുടെ മുൻ ചെയർമാനുമായിരുന്ന പത്മനാഥ് ഗൊഹെയ്ൻ ബറുവയാണ് തേസ്പൂർ നഗരത്തിൽ ആദ്യമായി ലിച്ചി തോട്ടങ്ങൾ സ്ഥാപിച്ച് ഈ കൃഷിക്ക് അടിത്തറയിട്ടത്. നൂറ് വർഷങ്ങൾക്കിപ്പുറം, ഈ പാരമ്പര്യം വൻ വിജയമായി മാറിയിരിക്കുകയാണ്. ‘അഗ്നിഗഡ് അഗ്രികൾച്ചറൽ പ്രൊഡ്യൂസേഴ്സ് ഗ്രൂപ്പ്’ നൽകുന്ന വിവരങ്ങൾ പ്രകാരം, ഇന്ന് ഈ മേഖലയിലെ 400ലധികം ബിഗ ഭൂമിയിലായി 150ലധികം കർഷകർ സജീവമായി ലിച്ചി കൃഷിയിൽ ഏർപ്പെട്ടിരിക്കുന്നു. ജിഐ പദവി ലഭിച്ചതോടെ ഈ കർഷകരുടെ ഉൽപന്നങ്ങൾക്ക് രാജ്യാന്തര വിപണിയിൽ തനതായ വ്യക്തിത്വവും ഉയർന്ന മൂല്യവും കൈവന്നിരിക്കുകയാണ്.

∙ കർഷകർക്ക് മികച്ച വരുമാനവും വിപണി ഉറപ്പും
പ്രാദേശിക വിപണിയിൽ ശക്തമായ ഡിമാൻഡ് നിലനിൽക്കുമ്പോഴും കയറ്റുമതി ശൃംഖലയുമായി സഹകരിച്ച കർഷകർക്ക് നിലവിലുള്ള ആഭ്യന്തര വിപണി നിരക്കുകളേക്കാൾ 10 ശതമാനം വരെ ഉയർന്ന വില ലഭ്യമാക്കാൻ ഈ രാജ്യാന്തര കയറ്റുമതിയിലൂടെ സാധിച്ചു. ഇത് കർഷകരുടെ വരുമാനം വർധിപ്പിക്കുന്നതിനും സുസ്ഥിരമായ ഉപജീവനമാർഗം ഉറപ്പാക്കുന്നതിനും കാരണമായി.

ഈ വിജയകരമായ കയറ്റുമതി കൂടുതൽ കർഷകരെ കയറ്റുമതി അധിഷ്ഠിത കൃഷിരീതികളിലേക്ക് ആകർഷിക്കുമെന്നും കൂടുതൽ വിപണി അവസരങ്ങൾ തുറക്കുമെന്നും വിലയിരുത്തപ്പെടുന്നു. വരും വർഷങ്ങളിൽ തേസ്പൂർ ലിച്ചിയുടെ കയറ്റുമതി വ്യാപ്തി ഇനിയും വർധിപ്പിക്കാനാണ് അധികൃതർ ലക്ഷ്യമിടുന്നത്.

അപെഡയുടെ നിർണായക ഇടപെടലുകൾ
വടക്കുകിഴക്കൻ മേഖലയിൽ നിന്നുള്ള കാർഷിക കയറ്റുമതി പ്രോത്സാഹിപ്പിക്കുന്നതിൽ അപെഡ വളരെ സജീവമായ പങ്കാണ് വഹിക്കുന്നത്. അടിസ്ഥാന സൗകര്യ വികസനം, ഗുണനിലവാര സർട്ടിഫിക്കേഷൻ, കർഷകർക്കുള്ള ശേഷി വികസന പരിപാടികൾ, രാജ്യാന്തര വിപണികളുമായുള്ള ബന്ധം സ്ഥാപിക്കൽ എന്നിവയിലൂടെ അപെഡ കർഷകരെയും കർഷക ഉത്പാദക സംഘടനകളെയും സഹായിക്കുന്നു.

1985ലെ അപെഡ ആക്ട് പ്രകാരം കേന്ദ്ര വാണിജ്യ-വ്യവസായ മന്ത്രാലയത്തിന് കീഴിൽ സ്ഥാപിതമായ ഈ അതോറിറ്റി, ഇന്ത്യയിലെ കാർഷിക-സംസ്കരിച്ച ഭക്ഷ്യോത്പന്നങ്ങളുടെ കയറ്റുമതി വർധിപ്പിക്കുന്നതിനും ആഗോള മൂല്യശൃംഖലയിൽ ഇന്ത്യൻ കർഷകരെ സമന്വയിപ്പിക്കുന്നതിനും തുടർച്ചയായി പ്രവർത്തിച്ചുവരുന്നു. തേസ്പൂർ ലിച്ചിയുടെ ദുബായ്, സിംഗപ്പൂർ യാത്ര വടക്കുകിഴക്കൻ മേഖലയുടെ കാർഷിക മുന്നേറ്റ ചരിത്രത്തിലെ ഒരു പുതിയ അധ്യായത്തിന്റെ തുടക്കം മാത്രമാണ്.