അന്‍വറിന്റെ യുഡിഎഫ് പ്രവേശനത്തില്‍ ഒറ്റയ്ക്ക് മറുപടി നല്‍കാനാകില്ല: വിഡി സതീശന്‍

അൻവറിൻ്റെ യുഡിഎഫ് പ്രവേശനത്തിൽ ഒറ്റയ്ക്ക് മറുപടി നൽകാനാകില്ലെന്നും,
മുഖ്യമന്ത്രിയുടെ രാജി ആവശ്യപ്പെട്ടുകൊണ്ടുള്ള സമരത്തിലാണ് പ്രതിപക്ഷമെന്നും വി ഡി സതീശൻ പുളിയൻമലയിൽ പറഞ്ഞു. ഐഎൻടിയുസി ജില്ലാ പ്രസിഡൻറായിരുന്ന കെ വി ജോർജ് കരിമറ്റത്തിന്റെ ഒന്നാം അനുസ്‌മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. പാർട്ടിയിൽ നിൽക്കുമ്പോൾ ഏത് തെറ്റായ കാര്യങ്ങൾക്കും സംരക്ഷണം നൽകുകയും പാർട്ടി വിട്ടാൽ നടപടിയെടുക്കുകയും ചെയ്യുന്ന രീതിയാണ് സിപിഎമ്മിൻ്റേത്. അൻവർ ഉന്നയിച്ച ആരോപണങ്ങളിൽ പലതും പ്രതിപക്ഷം നേരത്തെ പറഞ്ഞതാണ്. സർക്കാരിനെതിരെ ഏത് രീതിയിൽ പ്രതിഷേധിക്കണമെന്ന് തീരുമാനിക്കുന്നത് മാധ്യമങ്ങളല്ലെന്നും ഭരണകക്ഷിയിലെ മാറ്റങ്ങൾ ചർച്ച ചെയ്യുകയും ഗൗരവമായി നിരീക്ഷിക്കുകയും ചെയ്യുന്നുണ്ടെന്നും അദ്ദേഹം പുളിയൻമലയിൽ പറഞ്ഞു.